Cocuq Mərcanlıda şəhid Arif Fərhadovun xatirəsinə bulaq kompleksi inşa olunub
Cəbrayıl, 3 aprel, Aydın Yavərzadə, AZƏRTAC
Cəbrayıl rayonunun Cocuq Mərcanlı kəndində, Birinci Qarabağ müharibəsi şəhidi Arif Fərhadovun adını daşıyan “Şəhid bulağı” xatirə kompleksinin açılışı olub.
AZƏRTAC-ın bölgə müxbiri xəbər verir ki, bulaq kompleksinin açılış mərasimində Cocuq Mərcanlı kəndinin sakinləri, şəhidin ailə üzvləri, ziyalılar, hərbçilər, din xadimləri, o cümlədən Yeni Azərbaycan Partiyası (YAP) Səbail rayon Bibiheybət ərazi təşkilatının rəhbərliyi və nümayəndələri, şəhid anaları, şəhid ailələri iştirak ediblər. Öncə şəhidlərin xatirəsi bir dəqiqəlik sükutla yad olunub. Novruz Aslanov adına Cocuq Mərcanlı kənd tam orta məktəbinin direktoru Zamin Həziyev, şəhid Arif Heydərovun atası Maşallah kişi, Səbaildən olan şəhid anası Mehriban xanım, YAP Səbail rayon Bibiheybət ərazi təşkilatının sədri Sədaqət Həsənova və digər şəxslər çıxış edərək, Birinci və İkinci Qarabağ döyüşləri şəhidlərinin, o cümlədən Arif Heydərovun igidlik və qəhrəmanlığından, onların fədakarlıqlarından, tarixi Qələbə və Zəfərimizə verdikləri töhfələrdən danışıblar. Şəhidlərlə hər zaman fəxr edildiyi, qürur duyulduğu bildirilib, onların unudulmadığı və unudulmayacağı vurğulanıb. Həmçinin şanlı Aprel döyüşlərində əldə olunan qələbədən, Cocuq Mərcanlıya qayıdışdan bəhs edilib. “Şəhid bulağı”nın açılış mərasimində iştiraklarına görə səbailli şəhid ailələrinə, YAP Səbail rayon təşkilatına Cocuq Mərcanlı sakinləri və camaatı adından minnətdarlıq ifadə olunub. Çıxışlardan sonra məktəblilər tərəfindən Vətənə, şəhidlərə həsr olunan şerlər səsləndirilib. Daha sonra şəhidin atası Maşallah kişi və səbailli şəhid anası Mehriban xanım tərəfindən “Şəhid bulağı”nın üzərindən ağ örpək götürülüb, bulağın açılışı olub. Açılış mərasimindən sonra isə şəhidin adına ehsan süfrəsi açılıb, Arif Fərhadovun və cəmi şəhidlərin ruhlarına dualar olunub.
Qeyd edək ki, “Şəhid bulağı” YAP Səbail rayon təşkilatının sədri Muxtar Nağıyev və YAP Səbail rayon Bibiheybət ərazi təşkilatının sədri Sədaqət Həsənovanın, o cümlədən şəhidin ailəsinin təşəbbüsü, maddi-mənəvi dəstəyi hesabına başa gəlib.
Bölmənin digər xəbərləri
