“Daha çox pay almaq üçün hökuməti dağıtdılar” – Lökornü istefaya məcbur edildi?
Paris, 6 oktyabr, AZƏRTAC
Fransa siyasi həyatında görülməmiş bir hadisə yaşandı: Baş nazir Sebastyan Lökornu, hökumətini elan etdikdən cəmi 14 saat sonra istefa verdi. Bu, V Respublika tarixində ən qısamüddətli hökumət oldu. Onun istefasının əsas səbəbi isə Respublikaçılar Partiyasının (Les Républicains - LR) içində artan narazılıq və partiya rəhbəri Brüno Rötayonun təzyiqləri olub.
AZƏRTAC xəbər verir ki, sentyabrın 5-də axşam saatlarında, Brüno Rötayo hökumətdə yenidən daxili işlər naziri təyin olunsa da, sosial şəbəkədə gözlənilməz açıqlama yaydı: “Yeni hökumət tərkibi vəd edilən dəyişiklikləri əks etdirmir. Respublikaçıların Strateji Komitəsini çağırıram”. Bu açıqlama, artıq bir neçə gündür sağçı və solçu müxalifətin yeni hökuməti devirmək hədələrini artırdığı bir məqamda gəldi. “Bizimlə hesablaşılmadı”,–deyə Respublikaçılar narazılıqlarını bildirdilər.
Ertəsi gün, oktyabrın 6-da səhər saatlarında Yelisey sarayı rəsmi açıqlama yayaraq, Lökornünün istefasını qəbul etdiyini bildirib. Beləcə, 26 gün ərzində hökumətini formalaşdıra bilməyən Lökornü rekord dərəcədə qısa – sadəcə 14 saat Baş nazir oldu.
Lökornü “Matignon” sarayının qarşısında etdiyi çıxışda, “lazımi şərtlər olmadan Baş nazir olmaq mümkün deyil” deyərək, istefasına haqq qazandırıb. O, yeni hökumət tərkibində partiya maraqlarının üstün tutulduğunu, şəxsi ambisiyaların önə çıxdığını qeyd etdi və sözlərini belə tamamladı: “Ölkəni partiyadan üstün tutmaq lazımdır”.
Respublikaçılar partiyası isə yeni təyinatlardan narazı idi. Partiyanın əsas fiqurlarından olan Anni Jenevar (Kənd Təsərrüfatı), Filip Tabaro (Nəqliyyat) və Raşida Dati (Mədəniyyət) vəzifədə qalsa da, ümumi balansda “Makronçuların” payının çox olduğu bildirilirdi.
Hökumət böhranında əsas mübahisə mövzularından biri də Brüno Lö Merin yeni kabinetə, müdafiə naziri kimi, qayıdışı oldu. LR partiyası onu “Makronizmin simvolu”, “ictimai maliyyələrin dağılmasının memarı” adlandırdı. Brüno Lö Merin məsələsi son hədd oldu.
Brüno Rötayo jurnalistlərə açıqlamasında, Lö Merin təyinatından xəbərsiz olduğunu bildirdi və bununla aldadıldığını dedi: “Bir saat yarım Baş nazirin qəbulunda oldum, amma o, Lö Merin təyinatından heç nə demədi”.
Bu təyinatdan xəbər tutan LR üzvləri sosial şəbəkələrdə təzyiqi artırmağa başladılar. Kann şəhərinin LR meri David Lisnard, əgər partiyası hökumətdə qalmağa davam edərsə, LR-dəki vitse-prezident postundan istefa verəcəyini açıqladı.
Hökumət daxilində isə vəziyyətin nə qədər gərgin olduğu açıq-aşkar idi. Lökornünün yaxın ətrafı yeni kabinetin “sabitlik və yenilənmə” balansını əks etdirdiyini bildirsə də, bu arqument LR daxilində qəbul olunmadı. Partiya daxilindən gələn sərt reaksiyalar, sosial baza və seçicilərdən gələn narazılıq mesajları, partiyanın hökumətdə qalmasını mümkünsüz etdi.
Brüno Rötayo isə məsuliyyət daşımadığını bildirdi: “Bu hökumətin tərkibində iştirak edə bilmərik. Amma biz müxalifətə keçmirik,” – deyə o, TF1 kanalına müsahibəsində vurğuladı.
Makronçular LR-i “daha çox pay almaq üçün siyasi oyun oynamaqda” günahlandırır. “Hökumətin qurulması prosesini istifadə edib şərtləri ağırlaşdırdılar,” – deyə parlament çoxluğundakı deputatlardan biri bildirib.
Bölmənin digər xəbərləri
