Daşkənddə Həmrəylik Günü və Yeni il münasibətilə tədbir: “Mədəniyyət gücümüzdür - həmrəylik birliyimizdir” VİDEO
Bakı, 27 dekabr, AZƏRTAC
Azərbaycanın Özbəkistandakı səfirliyi nəzdində fəaliyyət göstərən Heydər Əliyev adına Azərbaycan Mədəniyyət Mərkəzində Dünya Azərbaycanlılarının Həmrəyliyi Günü və Yeni il münasibətilə “Mədəniyyət gücümüzdür - həmrəylik birliyimizdir” şüarı altında bayram tədbiri keçirilib.
Mərkəzdən AZƏRTAC-a bildirilib ki, tədbir Azərbaycan və Özbəkistanın Dövlət himnlərinin səsləndirilməsi ilə başlayıb.
Azərbaycanın Özbəkistandakı səfiri Hüseyn Quliyev iştirakçıları Dünya Azərbaycanlılarının Həmrəyliyi Günü və Yeni il münasibətilə təbrik edib. Səfir humanitar və mədəni təşəbbüslərin xalqlar arasında qarşılıqlı anlaşmanın möhkəmləndirilməsində mühüm rol oynadığını bildirərək, Azərbaycançılıq ideyasının Ümummilli Lider Heydər Əliyev tərəfindən əsası qoyulduğunu bildirib. Qeyd edib ki, bu siyasət Prezident İlham Əliyev tərəfindən uğurla davam etdirilir. Səfir Özbəkistanda yaşayan Azərbaycan diasporunun həmrəyliyin bir hissəsi olduğunu diqqətə çatdırıb.
Heydər Əliyev adına Azərbaycan Mədəniyyət Mərkəzinin direktoru Akif Marifli Dünya Azərbaycanlılarının Həmrəyliyi Gününün milli birlik və həmrəyliyin bariz ifadəsi olduğunu qeyd edib. O, hər iki ölkə prezidentlərinin sayəsində Azərbaycan və Özbəkistan arasında qarşılıqlı hörmət və etimada əsaslanan əməkdaşlığın müttəfiqlik səviyyəsinə yüksəldiyini qeyd edib. Akif Marifli bunun humanitar və mədəni əlaqələrin genişlənməsi üçün də möhkəm zəmin yaratdığını vurğulayıb.
Konsert proqramının musiqi hissəsində Azərbaycanın tanınmış xanəndəsi Rəvan Qaçayev və gənc müğənni Ülkər Abdullayeva çıxış ediblər. Onların ifasında Vətənə, milli kimliyə, dostluq və həmrəyliyə həsr olunmuş mahnılar səsləndirilib.
Teatr sənəti Heydər Əliyev adına Azərbaycan Mədəniyyət Mərkəzinin “Xarı Bülbül” teatr truppası tərəfindən təmsil olunub. Truppa Azərbaycan klassik dramaturgiyası və musiqili teatrına aid səhnəcikləri, eləcə də xalq mahnılarını tamaşaçılara təqdim edib.
Xoreoqrafik hissədə isə Mədəniyyət Mərkəzinin nəzdində fəaliyyət göstərən “Qarabağ Zəfəri” rəqs ansamblının çıxışları nümayiş olunub. Milli rəqslər xalqımızın tarixi yaddaşını, milli qürurunu və birlik ruhunu əks etdirib.
Tədbirin sonunda Özbəkistanda Azərbaycan mədəniyyətinin təbliğində fəal iştirak edən yaradıcı kollektivlər və ictimai fəallar təltif olunublar. Mükafatlandırılanlar teatr sənəti, milli rəqs, təsviri incəsənət, eləcə də televiziya və media sahələrini əhatə edib.
Bölmənin digər xəbərləri
