Davos Forumu Azərbaycana bir sıra iqtisadi və siyasi dividentlər qazandıracaq
Bakı, 18 yanvar, AZƏRTAC
Hər ilin yanvarında İsveçrənin Davos şəhərində ənənəvi Ümumdünya İqtisadi Forumu keçirilir. Forumda il ərzində dünya üçün əhəmiyyətli iqtisadi hadisələr müzakirə olunur, müxtəlif panellərdə fikir mübadilələri aparılır. Bu il də dünya ölkələrinin dövlət və hökumət başçıları, müxtəlif iri korporasiyaların rəhbərləri Davosda bir araya gəliblər. Sayca 49-cu Forumda dünya liderləri, iri şirkətlərin rəhbərləri, ekspertlər beynəlxalq birliyin qarşılaşdığı çətinlikləri müzakirə edir, yeni il üçün iqtisadi gündəliyi müəyyənləşdirirlər. Forum yanvarın 21-nə kimi davam edəcək. Forumda Azərbaycan Prezidenti İlham Əliyev iştirak edir, xarici ölkələrin rəsmiləri, hökumət başçıları, eləcə də dünyanın tanınmış şirkətlərinin rəhbərləri ilə görüşlər keçirir. Qeyd edək ki, bir neçə gün öncə Davos İqtisadi Forumunun rəsmi saytında Prezident İlham Əliyevin “Azərbaycanın 2017-ci il üçün iqtisadi prioritetləri” sərlövhəli məqaləsi verilib.
Bu fikirləri Davos Forumunun Azərbaycan üçün əhəmiyyətini AZƏRTAC-a şərh edən Prezident yanında QHT-lərə Dövlət Dəstəyi Şurasının üzvü, Beynəlxalq Münasibətlərin Araşdırılması Mərkəzinin (BMAM) sədri Rufiz Qonaqov söyləyib. R.Qonaqov deyib ki, Prezident İlham Əliyevin Forumda iştirak etməsi Azərbaycana bir sıra üstünlüklər qazandırır. Azərbaycan Prezidenti Davos Forumunda 10 dəfədən çox iştirak edib. Prezident İlham Əliyev Davos Forumunda ən fəal iştirak edən prezidentlərdən biridir. Bu da Azərbaycan üçün bir sıra dividentlər gətirir. Prezident hər il Davosda 30-a yaxın görüş keçirir. 1995-ci ildən başlayaraq Azərbaycan Ümumdünya İqtisadi Forumunda ölkə rəhbəri səviyyəsində təmsil olunur. Davos Forumu Azərbaycan üçün ölkədə həyata keçirilən iqtisadi islahatların yaratdığı yeni imkanları dünyaya çatdırmaq, ölkəyə investisiyaların və texnologiyaların axınına zəmin yaratmaq baxımından çox əhəmiyyətlidir. Dünyanın aparıcı iş adamları ilə birbaşa ünsiyyət, onlarda ölkəmizin iqtisadiyyatına investisiya etimadının daha da artırılmasına çalışmaq və bunu müasir yanaşmalarla nümayiş etdirmək vacibdir. Azərbaycan Prezidenti Davos Forumunun imkanlarından görüşləri, çıxışları ilə uğurlu şəkildə faydalanır. Dünyada iqtisadi inkişaf tempinin zəiflədiyi, qeyri-müəyyənliklərin artdığı bir zamanda Azərbaycanın 2017-ci il üzrə iqtisadi prioritetlərini aydın şəkildə açıqlaması Forumda ölkəmizə olan marağı daha da artırır. Dünyanın aparıcı şirkətləri, qlobal iqtisadiyyatın trendlərini müəyyən edənlər fərdi qaydada Azərbaycan iqtisadiyyatının vəziyyətini öyrənirlər. Ölkəmizə investorların cəlb edilməsi, ölkəmizin iqtisadi potensialının təbliğ olunması baxımından Forum olduqca əhəmiyyətlidir.
Bu günlərdə dünya iqtisadiyyatının nəbzinin Davosda döyündüyünü vurğulayan BMAM-ın sədri deyib: “Davos İqtisadi Forumu dünyanın ən böyük iqtisadi platforması sayılır. Burada dünyanın yüksək səviyyəli şəxsləri təmsil olunurlar. Forum Azərbaycan üçün həm post-neft ölkəsi, həm də həqiqətlərimizin dünyaya çatdırılması baxımından vacibdir. Azərbaycan brendinin dünyaya tanıdılması, qeyri-neft sektorunun inkişafı qarşımızda duran əsas vəzifələrdəndir. Azərbaycan Prezidenti çıxışlarında, müsahibələrində təkcə mövcud iqtisadi potensialımız haqda deyil, eyni zamanda, Azərbaycanın ayrılmaz hissəsi olan Dağlıq Qarabağın işğalı ilə ölkə iqtisadiyyatına vurulmuş ziyanla bağlı iştirakçıları məlumatlandırır. Biz bu mötəbər tribunadan istifadə edərək dünyaya həm də siyasi mesajlar ötürə bilirik. Artıq Azərbaycan start mövqedən deyil, dinamik inkişafda olan, sabitliyin bərqərar olduğu, yeni hədəflərə doğru irəliləyən bir ölkə kimi Davosda çıxış edir. İqtisadiyyatımız sabitləşib, təbii ehtiyatlarımızdan cəmiyyətin firavanlığı naminə istifadə olunur. Azərbaycanın bu gün regionun lider dövləti və ətraf bölgələrin inkişafı üçün təşəbbüslərin müəllifi olduğunu dünya qəbul edib”.
Rufiz Qonaqov bildirib ki, Davos Forumu Azərbaycan Prezidentinin iştirakı ilə daha da mötəbərləşib: “Davos Forumu Azərbaycanın mövqeyini dünyaya çatdırmaq baxımından bir fürsətdir. Prezident İlham Əliyev məqaləsində Davos Forumunun əhəmiyyəti, Azərbaycan iqtisadiyyatının problemləri, 2017-ci il üçün prioritetlərimiz barədə ətraflı məlumat verib. Müşahidələr göstərir ki, Forum iştirakçılarının Azərbaycana böyük marağı var. Hər bir güclü şirkət çalışır ki, Azərbaycanda nümayəndəliklərini açsın. Düşünürəm ki, indiki vacib məqamda Davos Forumu Azərbaycana bir sıra iqtisadi və siyasi dividentlər qazandıracaq”.
Bölmənin digər xəbərləri
