DEPORTASİYA OLUNMUŞ YƏHUDİLƏRİN QOHUMLARI MƏHKƏMƏ İDDİASI İRƏLİ SÜRMÜŞLƏR
İddiaçılar FDYŞ-ni nasistlərlə bilərəkdən əməkdaşlıqda və bundan maddi qazanc əldə etməkdə təqsirləndirirlər. Vəkillərin sözlərinə görə, Vişi hökumətinin Daxili İşlər Nazirliyi yəhudilərin 3-cü dərəcəli vaqonlarda daşınması üçün pul da ödəyirmiş, lakin şirkət mal-qara daşınması üçün nəzərdə tutulan vaqonlardan istifadə edirmiş.
Qalmaqal Tuluza məhkəməsinin qərarından sonra başlanmışdır. Məhkəmə 1944-cü ildə Paris ətrafındakı Dransi faşist düşərgəsinə gətirilmiş iki yəhidi qardaşın mənəvi və fiziki əzablarının əvəzində Fransa dəmir yolları şirkətinin 80 min dollar məbləğində kompensasiya ödəməsi barədə qərar qəbul etmişdir. Məhkəmənin qərarına görə, FDYŞ yəhudilərin düşərgələrə daşınmasına etirazını bildirmədiyi üçün təqsirkar sayıla bilər.
Bəzi müşahidəçilərin fikrincə, iddialar təmin edilərsə, buna bənzər müraciətlərin sayı-hesabı olmayacaqdır. Bu halda, FDYŞ və ölkə hökuməti deportasiya edilmiş yəhudilərin qohumlarına on milyonlarla dollar kompensasiya ödəməli olacaqdır.
Fransa dəmir yollarının nümayəndəsi bildirmişdir ki, əməkdaşlarının yəhudilərin deportasiya prosesində bilərəkdən nasistlərə kömək etməsi iddiaları şirkətdə hiddət doğurur. Onun sözlərinə görə, müharibə dövründə bütün daşımalar işğalçı hökumətin ciddi nəzarəti altında yerinə yetirilirdi. Şirkət məhkəmənin qərarına qarşı kassasiya şikayəti irəli sürmüşdür.
Bölmənin digər xəbərləri
