Deputat: Bütün dünya soydaşlarımızın Qərbi Azərbaycana qayıtmaq hüququnu qəbul etməlidir
Bakı, 13 yanvar, AZƏRTAC
Ermənistan Qərbi Azərbaycan mövzusu ilə bağlı nə qədər təlaşa düşsə də, bu, 44 günlük Vətən müharibəsinin mövcud reallığıdır. Dövlətimizin başçısı yerli telekanallara müsahibəsində də bu məsələyə bir daha aydınlıq gətirdi. “Qarabağ dərdi, problemi olan yerdə Qərbi azərbaycanlıların hüquqlarından danışmaq vaxtından əvvəl atılan bir atəşə bənzəyə bilərdi”, - deyən dövlətimizin başçısı Qərbi azərbaycanlıların öz dədə-baba torpaqlarına qayıtmalı olduqlarını diqqətə çatdırdı. Çünki bu, onların hüququdur. Azərbaycan dövləti də soydaşlarımızın hüquqlarını təmin etmək üçün əlindən gələni edəcək.
Bu fikirləri AZƏRTAC-a açıqlamasında Milli Məclisin deputatı Könül Nurullayeva deyib.
Deputatın sözlərinə görə, reallıq budur ki, Qərbi azərbaycanlıların öz doğma torpaqlarına qayıtması Ermənistanın xeyrinədir. Bunu Prezident İlham Əliyev jurnalistlərə müsahibəsində də qeyd etdi. Bildirdi ki, bu gün Avrasiya məkanında monoetnik dövlətlər yoxdur və Ermənistan üçün də yaxşı olar ki, bu monodövlət damğasını öz üzərindən götürsün. “Bu mənada Qərbi Azərbaycan mövzusu bu gün tam haqlı olaraq beynəlxalq arenaya çıxarılıb. Bu istiqamətdə daha fəal işin aparılmasına çox böyük ehtiyac var. Qərbi azərbaycanlıların vaxtilə yaşadıqları kəndlər indi boşdur, yəni, məskunlaşma yoxdur. Soydaşlarımızın ata-baba yurduna qayıtmaları orada yaşayan ermənilərin oradan çıxarılması demək deyil. Bir sözlə, dövlətimizin başçısının da söylədiyi kimi, vaxtilə Qarabağ mövzusu bütün Azərbaycan xalqını birləşdirdiyi kimi, eyni yanaşmanı Qərbi Azərbaycan mövzusunda da görməliyik. Biz bütün tarixi torpaqlarımıza qayıdacağıq. Azərbaycan Qaçqınlar Cəmiyyətinin öz fəaliyyətini Qərbi Azərbaycan İcması kimi davam etdirməsi məhz bununla bağlıdır”, - deyə K.Nurullayeva qeyd edib.
Deputat bildirib ki, 30 ildən sonra Qarabağı qaytardığımız kimi, vaxtilə doğma torpaqlarından zorla çıxarılmış soydaşlarımızın Qərbi Azərbaycana qaytarılmasına da nail olacağıq. Ermənilər həm Qarabağda, həm də Qərbi Azərbaycanda tariximizi məqsədli şəkildə silmək istəsələr də, buna nail ola bilməyiblər. Çünki indiki Ermənistan ərazisində tarix boyu azərbaycanlıların yaşamaları barədə kifayət qədər tarixi sənəd var.
“Dövlətimizin başçısının da söylədiyi kimi, biz 1990-cı illərin əvvəllərində Qarabağ münaqişəsi ilə bağlı təhrif edilmiş təsəvvürü tamamilə dəyişdirə bildik. İnformasiya müharibəsi və İkinci Qarabağ müharibəsi onu göstərdi ki, bu, az əhəmiyyət kəsb etmir. Hazırda eyni yanaşma Qərbi Azərbaycana qayıdışla bağlı olmalıdır. Dünya tarixi faktlarla daha yaxından tanış olmalı, soydaşlarımızın Qərbi Azərbaycana - doğma yurdlarına qayıtma hüququnun olduğunu anlamalı və qəbul etməlidir”, - deyə deputat vurğulayıb.
Bölmənin digər xəbərləri
