Deputat: Makron Paşinyana “bacılıq” etmək siyasətindən əl çəkmir - ŞƏRH
Bakı, 1 sentyabr, AZƏRTAC
Fransa prezidenti Emmanuel Makron Prezident İlham Əliyevə zəng edərək Laçın yolu ilə bağlı məsələni müzakirə edib. Təəssüf ki, Makron Paşinyana “bacılıq” etmək siyasətindən əl çəkmir və Cənubi Qafqazda pozucu fəaliyyətini davam etdirir. Dövlətimizin başçısı da Makrona açıq şəkildə bir daha bildirdi ki, Ağdam-Xankəndi yolu açılandan sonra sərhəd və gömrük qaydalarına riayət olunması şərtilə Laçın yolunda daşımalar bərpa oluna bilər. Ümumiyyətlə, Fransa prezidenti Emmanuel Makronun Ermənistanla Azərbaycan arasında münasibətlərin normallaşma prosesinə müdaxilə etməsi və ermənipərəst mövqedən çıxışı sülh müqaviləsinin imzalanması prosesini kölgə altına salıb. Makron və onun hökuməti açıq şəkildə ermənilərin dayağı olduğunu və Azərbaycana düşmən münasibət bəslədiyini nümayiş etdirir. Beynəlxalq hüquq və normaların tələblərini ayaq altına atan Fransa hökumətinin məqsədi erməni separatizmini və onların çirkin niyyətlərini davam etdirməsini dəstəkləməkdir.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
Deputatın sözlərinə görə, Fransanın məkrli siyasəti və ermənilərə havadarlıq etməsi torpaqlarımızın 30 ilə yaxın müddətdə işğal altında qalmasında və BMT TŞ-nın qətnamələrinin icra olunmamasında da az rol oynamayıb. 44 günlük Vətən müharibəsi başlayana qədər Fransa özünün ermənipərəst siyasətini maskalanmış şəkildə davam etdirirdisə, müharibə zamanı açıq müstəviyə keçdi və Azərbaycana təzyiq göstərməyə çalışmaqla əsl üzünü büruzə verdi: “Belə ki, 44 günlük Vətən müharibəsi zamanı Fransanın BMT TŞ-da Azərbaycana qarşı qətnamə qəbul etdirmək cəhdi BMT-dəki dostlarımızın ədalətli mövqeyi sayəsində iflasa uğradı. Fransa Azərbaycan-Ermənistan müharibəsi başa çatandan sonra da sülh müqaviləsinin imzalanmasına mane olmaq üçün əsassız səy göstərdi və iki ölkə arasında gedən danışıqlar prosesinə müdaxilə edərək açıq şəkildə ermənilərin tərəfindən çıxış etməyə başladı. Fransa Avropa İttifaqındakı imkanlarından və Ukrayna müharibəsində Rusiyanın zəifləməsindən istifadə edərək Ermənistana pensionerlərdən təşkil olunmuş hərbiləşdirilmiş missiya göndərilməsinə nail oldu. Halbuki, Avropa İttifaqı Azərbaycanla Ermənistan arasında münasibətlərin tənzimlənməsinə təşəbbüs göstərən tərəf kimi belə bir missiyanı sərhədimizə göndərəndə Azərbaycanla razılaşdırmalı idi. Lakin Fransanın ermənipərəst siyasətinin təzyiqi nəticəsində Ermənistanın Azərbaycanla sərhədinə belə bir missiya göndərildi və bununla da sülhyaranma prosesinə zərbə vurulmuş oldu. Avropa İttifaqının göndərdiyi həmin missiya Azərbaycanla sərhəddə yalnız binokllarla ərazilərimizə baxaraq fotoşou nümayiş etdirdi ki, bununla da həmin missiyanın məqsədləri iflasa uğradı. Makronun rəhbərliyi altında Fransanın apardığı anti-Azərbaycan siyasətinin davamı olaraq Paris meri Ann İdalqonun rəhbərlik etdiyi nümayəndə heyəti separatçılara humanitar yardım adı altında göndərilən avtomobil karvanı ilə sərhədimizə gələrək fotoşounu davam etdirdi və Azərbaycana Laçın yolu ilə bağlı təzyiq göstərməyə çalışdı. Burada belə bir sual yaranır. Parisin merinin işi-gücü yoxdurmu ki, Azərbaycanın sərhədinə gəlib poz verir? Təbii ki, Ann İdalqonun yarıtmaz fəaliyyəti nəticəsində dünyanın gözəl şəhərlərindən biri olan Paris bu gün çirkabın və üfunətin içində batır. Məişət tullantıları günlərlə küçələrdən yığışdırılmır. Ann İdalqonun merliyi dövründə Paris xaos və xaraba şəhərinə çevrilib. Onun Parisin küçələrini təmizləyənlərə əməkhaqlarını vaxtında ödəmək əvəzinə onlara çatmalı vəsaitdən oğurlayaraq yardım adı altında avtomobil karvanını separatçılara göndərməsi gülünc doğurur. Əslində Ann İdalqonun atası da ermənipərəst olub. Bu gün onun tullantılar içində batan Parisi özbaşına sahibsiz qoyaraq Ermənistana səfər etməsi atasının ermənipərəst siyasətinin nümayişkaranə davam etdirilməsi ilə bağlıdır”.
Deputat bildirib ki, Makronun yarıtmaz siyasəti ancaq Azərbaycana qarşı deyil, həm də Avropa Birliyində təmsil olunan digər ölkələrə qarşı da çevrilib. Onun rəhbərliyi Fransanı heç olmadığı qədər hörmətdən salıb: “Məsələn, İtaliyanın Baş naziri Corca Meloni Fransanın və Makronun yarıtmaz siyasətini kəskin tənqid edərək deyib: “Emmanuel Makron bizi iyrənc, kinli və məsuliyyətsiz adlandırdı. Makron, məsuliyyətsiz olan açıq şəkildə Liviyanı bombalayandır. Çünki onlara İtaliyanın Liviya ilə enerji sahəsindəki yüksək münasibətləri qıcıq verirdi. Məsuliyyətsiz - bizi bu gün yaşadığımız qeyri-leqal miqrasiyaya və xaosa sürükləyəndir. Kinli - Makron, polisin gücü ilə miqrantları qayıqlarla bizim Ventimilyaya göndərən fransızlardır. Hər şeydən əvvəl hər şeyi öz adı ilə çağıracağıq. İyrənc olanı - Fransanın afrikalıları istismar etməyinə davam etməsidir. O cümlədən ağalıq etmək şərti ilə 14 Afrika ölkəsi üçün pul çap etməsi və Nigeriyada olduğu kimi afrikalı uşaqları öz filiz yataqlarında işləməyə məcbur edərək Fransanın AES-lərinin işlənməsi üçün uranın çıxarılmasına məcbur etməsidir. Halbuki, nigeriyalıların 90 faizi elektriksiz yaşayırlar. Bizə notasiya oxumaq lazım deyil, Makron! Afrikalı insanlar sizdən qaçırlar. Bu problemi həll etmək üçün afrikalıları Avropaya gətirməklə yox, afrikalıları sizin kimi avropalılardan azad etməklə həll etmək lazımdır. Bizə əxlaq öyrətmək lazım deyil. Bu sənə aydındırmı?!”
“Makron və onun hökuməti yəqin ki, Azərbaycanı Afrika ölkələri ilə səhv salır. Azərbaycan Fransa üçün Afrika ölkəsi deyil. Azərbaycan 105 il əvvəl müstəqilliyini bəyan etmiş və Fransadan qabaq qadınların hüquqlarını tanıyan dünyəvi dövlətdir. Azərbaycanda Fransadan fərqli olaraq antisemitizm, diskriminasiya və ayrı-seçkilik yoxdur. Siz müdaxiləni dayandırsanız, Xankəndindəki ermənilər də vətəndaşlarımız olaraq təhlükəsiz və sülh şəraitində yaşamaq imkanını qazanacaqlar. Bir daha vurğulamaq istəyirəm ki, Azərbaycanı haqq yolundan heç kim çəkindirə bilməz. Biz suveren ərazilərimizin bütövlüyünü döyüş meydanında təmin etmişik və heç kim icazəmiz olmadan ərazilərimizə girə bilməz. Kimsə buna cəhd edərsə, cavabımız çox ciddi və amansız olacaq” - deyə Azər Badamov qeyd edib.
Bölmənin digər xəbərləri
