Deputat: Prezidentin müsahibəsi Azərbaycanın gələcək onilliklərinə dair milli inkişaf doktrinasını ehtiva edir
Bakı, 8 yanvar, AZƏRTAC
Prezident İlham Əliyev yerli media nümayəndələrinə verdiyi genişmiqyaslı müsahibə ilə ölkəmizin suverenliyinin tam bərpasından sonra keçdiyi yeni tarixi dövrün dərin siyasi və iqtisadi təhlilini təqdim etdi. Dövlətimizin başçısının qətiyyətli bəyanatları Azərbaycanın daxili sabitliyinin, xarici siyasətinin və quruculuq əzminin sarsılmazlığını beynəlxalq ictimaiyyətin diqqətinə bir daha çatdırdı.
Bu fikirləri AZƏRTAC-a açıqlamasında Milli Məclisin deputatı Anar Məmmədov səsləndirib.
Onun sözlərinə görə, Prezidentin qətiyyətli və uzaqgörən bəyanatları Azərbaycanın artıq yalnız regional reallıqları müəyyən edən subyekt deyil, həm də qlobal miqyasda strateji əhəmiyyətə malik güc mərkəzi olduğunu göstərir. Dövlət başçısı Azərbaycanın prioritet sahələrdə qazandığı nailiyyətlər, icra olunan layihələr haqqında genişəhatəli məlumat verməklə yanaşı, qarşıda duran hədəflərlə əlaqədar prioritet istiqamətləri də ölkə ictimaiyyətinə çatdırdı. Həm xarici, həm də daxili auditoriya üçün mühüm mesajlar verildi. Prezidentin çıxışı xüsusilə regionda baş verən dəyişikliklər, sosial-iqtisadi inkişaf və dövlətin strateji layihələri, həm daxili, həm də xarici siyasətdə qarşıda duran prioritetlər ilə bağlı verdiyi açıqlamalarla yadda qaldı. Daxili siyasət məsələlərinə xüsusi yer ayrılması dövlət idarəçiliyində sosial rifah amilinin prioritetliyini bir daha ön plana çıxardı. İqtisadiyyatın şaxələndirilməsi, qeyri-neft sektorunun inkişafı, regionların balanslı tərəqqisi və əhalinin sosial müdafiəsinin gücləndirilməsi dövlət siyasətinin əsas sütunları kimi təqdim olundu. Bu yanaşma Azərbaycanın uzunmüddətli dayanıqlı inkişaf modelinə sadiqliyini ifadə edir. Müsahibə üç saat yaxın davam etməsi isə hər şeydən öncə Azərbaycan Prezidentinin media sahəsinə verdiyi önəmin, mətbuatla sıx münasibətlərinin göstəricisidir.
“Dövlətimizin başçısı müsahibə zamanı, həmçinin regionların idarə edilməsində tətbiq olunan yeni idarəetmə modeli - Xüsusi Nümayəndəlik İnstitutu barədə danışdı. Kadr seçimində peşəkarlıq və dövlətə sədaqət prinsiplərinin alternativsiz olduğunu xüsusi vurğuladı. Prezident İlham Əliyev Naxçıvan Muxtar Respublikasında yaradılmış xüsusi nümayəndəlik institutu ilə bağlı səmimi və qətiyyətli mövqeyini ifadə edərək bildirdi ki, dövlətin etimadını doğrultmayan heç bir vəzifəli şəxs cəzasız qalmır.
Düzdür, dövlət başçısı tərəfindən yüksək vəzifəyə təyin olunmaq böyük etimaddır, lakin bu etimad həm də şəxsi məsuliyyət tələb edir. Prezidentin qeyd etdiyi kimi, vəzifəsindən kənarlaşdırılma faktı göstərir ki, kadrın fəaliyyəti xalqın və dövlətin maraqlarına deyil, şəxsi ambisiyalara xidmət etdikdə bu, dərhal rəsmi reaksiya ilə qarşılanır. Bu açıqlama dövlət idarəçiliyində “toxunulmaz kadr” anlayışının olmadığını bir daha təsdiq edir. Hər bir məmur, statusundan asılı olmayaraq, fəaliyyətinin səmərəliliyinə görə birbaşa dövlət başçısı və cəmiyyət qarşısında cavabdehdir. Eyni zamanda, dövlətimizin başçısının institusional islahatlara verdiyi əhəmiyyət hüquqi dövlət quruculuğunun və idarəetmədə şəffaflığın möhkəmləndirilməsinə yönəlmiş ardıcıl siyasətin davamı kimi qiymətləndirilə bilər”, - deyə A.Məmmədov qeyd edib.
Deputat bildirib ki, dövlətimizin başçısı müsahibəsində, həmçinin işğaldan azad edilmiş torpaqların bərpasında yeni keyfiyyət mərhələsinin - horizontal inteqrasiyanın başladığını diqqətə çatdırdı. Bu strateji vəzifənin icrası Şuşa, Ağdam, Füzuli, Laçın, Kəlbəcər və Zəngilanı birləşdirən müasir yol-nəqliyyat infrastrukturu bölgənin iqtisadi qan damarlarını formalaşdırır. Bu, region daxilində logistik xərclərin azaldılmasına və hərəkət intensivliyinin artmasına imkan verir, bölgələrin bir-biri ilə inteqrasiyasının kənd təsərrüfatı, turizm və sənaye sahələrində vahid dəyər zəncirinin yaradılmasını təmin edir, bununla da əhalinin məskunlaşdığı məntəqələr arasında kəsintisiz əlaqənin olması sosial xidmətlərin əlçatanlığını artırır və bu ərazilərdə həyat keyfiyyətini ölkə üzrə orta göstəricilərdən yuxarıya qaldırır.
“Azərbaycan-ABŞ münasibətlərinə də toxunan Prezident İlham Əliyev iki ölkə arasında münasibətlərin artıq daha konstruktiv və qarşılıqlı hörmətə əsaslanan müstəviyə keçdiyini vurğuladı. Azərbaycanın suverenliyini və ərazi bütövlüyünü tam bərpa etməsindən sonra yaranan yeni reallıqların Vaşinqton tərəfindən daha dərindən dərk edilməyə başlandığını diqqətə çatdırdı. Beləliklə qeyd etmək olar ki, Prezident İlham Əliyevin bu müsahibəsi, sadəcə, birillik fəaliyyətin hesabatı deyil, həm də qüdrətli Azərbaycanın gələcək onilliklərini əhatə edən milli inkişaf doktrinasıdır. Dövlət başçısının qətiyyətli bəyanatları və elan etdiyi strateji prioritetlər bir daha təsdiq edir ki, Azərbaycan xalqı öz liderinin rəhbərliyi ilə daha böyük zəfərlərə, sarsılmaz sabitliyə və yüksək rifaha doğru inamla addımlayır. Bu çıxış həm dostlar, həm də rəqiblər üçün aydın bir mesajdır: Azərbaycan öz milli maraqlarını qorumağa və regionun taleyini müəyyən etməyə qadir olan, sarsılmaz iradəyə malik güclü dövlətdir”, - deyə Anar Məmmədov vurğulayıb.
Bölmənin digər xəbərləri
