Deputat: Qarabağdakı silahlı erməni quldurlarının əməllərinə bəraət qazandırmağa çalışmaq BBC üçün ləkədir
Bakı, 7 sentyabr, AZƏRTAC
Son vaxtlar BBC telekanalının Azərbaycan-Ermənistan münasibətləri, Qarabağda yaşayan ermənilərin vəziyyəti haqqında yaydığı materiallar reallıqdan tamamilə uzaqdır və qərəzli xarakter daşıyır. Bu qeyri-obyektiv materiallarda Azərbaycan əleyhinə söylənilən fikirlər, Qarabağdakı separatçıların müdafiə və təbliğ edilməsi göstərir ki, telekanal ermənilərə satılıb və onların mənfur məqsədlərinə xidmət edir. Dünyada geniş əhatə dairəsinə malik olan BBC həqiqətləri dilə gətirmək, 30 il işğal altında saxlanılan Azərbaycan torpaqlarının, dağıdılmış yüzlərlə şəhər və kəndin vəziyyətini işıqlandırmaq, Qarabağda silahlı erməni quldurlarının əməllərini ifşa etmək əvəzinə, separatçılara haqq qazandırır ki, bu da yolverilməzdir.
Bu sözləri Milli Məclisin Aqrar siyasət komitəsinin sədri Tahir Rzayev AZƏRTAC-a açıqlamasında söyləyib.
Deputat bildirib ki, bu, BBC-nin məqsədinin Azərbaycanın artan nüfuzuna kölgə salmaq, separatçılara dəstək vermək və münaqişəni yatırtmaq yox, qızışdırmaq olduğunu bir daha sübut edir. Azərbaycanda yaşayan bütün etnik qruplar eyni hüquq və səlahiyyətlərə malik olduqları halda Qarabağda yaşayan ermənilərə üstünlük vermək, onları hansısa yüksək səlahiyyətə malik olduğunu iddia etmək Azərbaycan Respublikasının Konstitusiyasına ziddir və ədalətli seçim deyil.
“Hadisələrə ermənipərəst mövqedən yanaşmaq, reallıqları danmaq, Qarabağdakı canilərə bəraət qazandırmaq, onların halına acımaq və bunu dünyaya nümayiş etdirmək BBC və onun Azərbaycan xidməti üçün ləkədir, eyni zamanda, azad sözün imkanlarından sui-istifadə etmək, telekanalı hörmətdən salmaqdır. Bu jurnalistika etikasına, prinsiplərinə, sivil media dəyərlərinə, ilk növbədə, insanlığa ziddir.
Başqasının taleyini, əsl həqiqətləri düşünən insan peşəsindən, vəzifəsindən asılı olmayaraq, ali dəyərləri - insanlığı üstün tutmalıdır. Ancaq görünür, BBC-nin Azərbaycan haqqında materiallar hazırlayan əməkdaşları insanlıqdan, həqiqətlərdən uzaqdırlar, onlar riyakarların, cəlladların şirin dilinə, puluna aldanıblar və ona görə də həqiqətləri təhrif edirlər. Kanal günahsızı günahlandırır, əli insan qanına batanları qəhrəman kimi təbliğ edir, onlara çıxış etmək, iftiralar söyləmək üçün imkan yaradır”, - deyə o bildirib.
Media orqanının separatizmi təbliğ edən, Azərbaycan reallıqlarına kölgə salan bu mövqeyinin arzuolunmaz olduğunu qeyd edən T.Rzayev deyib: “Belə anti-Azərbaycan mövqedən çıxış etmək göstərir ki, BBC bir qrup erməninin əlində oyuncağa çevrilib, yolunu azıb, ermənipərəst mövqe tutmaqla öz nüfuzunu alçaltmaqdadır. Bu kanalın əməkdaşları dərk etməlidirlər ki, hərəkətləri və yanlış mövqeləri ilə Böyük Britaniya və Azərbaycan arasındakı sağlam münasibətlərə xələl gətirə bilərlər. Əlbəttə, bu yolverilməzdir. BBC rəhbərliyi iki ölkə arasında mövcud olan əməkdaşlığa, münasibətlərə kölgə salmamaq üçün öz səhvlərini düzəltməlidirlər. Sağlam media, mətbuat aralığa nifaq salmağa, reallıqları danmağa, nüfuzunu satmağa, alçaltmağa yox, xeyirxah məqsədlərə, ali dəyərlərə xidmət etməlidir”.
Bölmənin digər xəbərləri
