Deputat: Şuşamızın yağı tapdağından qurtulması Zəfərimizin əsas açarı oldu
Bakı, 10 noyabr, AZƏRTAC
Azərbaycan möhtəşəm Qələbəsi ilə ərazi bütövlüyünü, həm də tarixi ədaləti bərpa edərək tarixi missiyasını yerinə yetirdi. Azərbaycan Ermənistanın 30 il ərzində qurduğu bütün müdafiə istehkamlarını, döyüş mövqelərini 44 günə məhv etdi. Bu şanlı bayramın sevincini bizə Prezident, Müzəffər Ali Baş Komandan İlham Əliyevin rəhbərliyi ilə hərbçilərimiz - qəhrəman əsgər və zabitlərimiz yaşatdılar. O hərbçilər ki, bir il əvvəl qanları, canları ilə 28 illik Şuşa həsrətimizə son qoydular, Şuşa döyüşləri ilə dünya hərb elmində yeni səhifə açdılar, qeyri-mümkün görünənləri mümkün etdilər.
Bu sözləri AZƏRTAC-a açıqlamasında Milli Məclisin deputatı Jalə Əliyeva bildirib.
“Biz 8 Noyabr - Zəfər Gününü Şuşada, Cıdır düzündə qeyd etdik”, - deyən deputat diqqətə çatdırıb ki, məhz Şuşanın azad olunması ilə düşmənin beli qırıldı, o, diz çökdürüldü. Şuşamızın yağı tapdağından qurtulması Qələbəmizin, Zəfərimizin əsas açarı oldu. Şuşanın azad edilməsindən cəmi iki gün sonra - noyabrın 9-dan 10-na keçən gecə 44 günlük İkinci Qarabağ müharibəsi möhtəşəm Qələbəmizlə başa çatdı və münaqişəyə son qoyuldu.
Prezident, qalib Sərkərdə, tarixi Zəfərimizin əsas memarı İlham Əliyev birinci xanım Mehriban Əliyeva ilə birlikdə Zəfər Günündə Şuşada oldular, oradan bədxahlara və dünyaya növbəti dəfə mesaj verdilər. Müzəffər Ali Baş Komandan tarixi çıxışında bildirdi ki, on minlərlə Azərbaycan gənci, əsgəri, zabiti sinəsini qabağa verərək düşmənə yerini göstərdi. Düşmən əbədi olaraq məğlubedilmiş xalq və dövlət damğası ilə yaşayacaq.
Qalib Sərkərdəmizin də dediyi kimi, hər il işğal dövründə düşmən bizim üçün müqəddəs olan Şuşada may ayında şəhərin işğalını bayram edirdi. Amma bu ilin may ayında Cıdır düzündə “Xarıbülbül” festivalı keçirildi, muğamımız oxundu.
Avqust ayında Vaqif Poeziya Günləri keçirildi, buradan Vaqifin və digər dahi şairlərimizin şeirləri səsləndi. Artıq bu torpaqlarda, bu səmada bu torpaq üçün, bu səma üçün yad dildə nə mahnı eşidiləcək, nə başqa bir yersiz bəyanat səslənəcək. Bundan sonra bu diyara Azərbaycan dili hakim olacaq, necə ki, tarixdə belə olub. Şuşa məscidində azan səsi, Cıdır düzündə muğam səsi, Vaqifin məqbərəsi önündə şeirlər səslənir. Bax, reallıq budur.
Deputat vurğulayıb ki, bütün beynəlxalq təzyiqlərə və hədə-qorxulara baxmayaraq, xalqımız yumruq kimi birləşdi və Prezidentinin, Ali Baş Komandanının, Ordusunun arxasında dayandı. Ermənistan ordusunda fərarilərin sayı artsa da, Azərbaycan Ordusunda bir nəfər də döyüş meydanından qaçmadı. Milli birlik özünü göstərdi və biz bir yumruq olduq.
Azərbaycan Silahlı Qüvvələrinin “yenilməz Ermənistan ordusu” mifini darmadağın etdiyini qeyd edən J.Əliyeva deyib: “Gücümüz və həmrəyliyimiz qarşısında tab gətirə bilməyən düşmən noyabrın 9-dan 10-na keçən gecə kapitulyasiya aktını imzalayaraq təslim oldu. Bütün dünya Azərbaycan xalqının döyüş əzminin və qətiyyətinin şahidi oldu.
Dövlətimizin başçısının vurğuladığı kimi, biz müharibə dövründə müharibə qanunlarına riayət etdik və müharibə qanunlarını pozmadıq. Müharibədə olduğu kimi diplomatiyada da özümüzü ləyaqətlə apardıq.
Zəfər Günündən sonra 9 Noyabr - Dövlət Bayrağı Gününün qeyd olunmasını ikiqat bayram adlandıran deputat bildirib ki, 113 il əvvəl ilk müstəqil Azərbaycanımızın səmasında dalğalandırılan ay-ulduzlu, üçrəngli bayrağımız bu gün də başımızın üstündə, Azərbaycanımızın bütün guşələrində, Qarabağımızda dalğalanır. Müqəddəs bayrağımız Vətən, Torpaq, Ana qədər əzizdir, doğmadır. Düşmən qarşısında əyilməyən başlar məhz bayraq önündə əyilir. Biz də üçrəngli bayrağımız qarşısında baş əyir, onunla qürurlanır, fəxr edirik. Zəfərimiz əbədi, bayrağımız daim ucalarda olsun.
10 noyabr tarixinin də önəmindən danışan deputat bildirib ki, məhz bu gündə Azərbaycan, Rusiya prezidentləri və Ermənistan baş naziri arasında üçtərəfli Bəyanat imzalanıb, 30 ilə yaxın bizə meydan oxuyan düşmən kapitulyasiya aktına imza atmağa məcbur olub. Azərbaycan “Dəmir yumruq”la düşmənin başına elə bir zərbə vurub ki, özünün məğlubiyyətini, bizim isə Qələbəmizi etiraf etməkdən başqa çarəsi qalmadı. 10 noyabr tarixinin bizim həyatımızda, taleyimizdə xüsusi yeri var.
8, 9, 10 noyabr tarixləri bir-birindən gözəl günlərdir.
Bu günləri yazanlar, yaradanlar, tarixə həkk etdirənlər var olsunlar!
Qarabağ Azərbaycandır və Qarabağ Azərbaycanındır!
Bölmənin digər xəbərləri
