CƏMİYYƏT
DOST İş Mərkəzinin direktoru Firudin Cəbrayılov təltif edilib
Bakı, 24 iyun, AZƏRTAC
Prezident İlham Əliyevin bu gün imzaladığı sərəncamlarla ölkəmizin ərazilərinin işğaldan azad edilməsi uğrunda döyüş əməliyyatlarında şəxsi igidlik və şücaət nümayiş etdirdikləri üçün təltif edilən hərbi qulluqçulardan biri də DOST İş Mərkəzinin direktoru Firudin Cəbrayılovdur.
Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, Firudin Cəbrayılov “Füzulinin azad olunmasına görə” və “Cəbrayılın azad olunmasına görə” medalları ilə təltif olunub. O, ötən ilin dekabr ayında isə dövlət başçısının Sərəncamı ilə “Xocavəndin azad olunmasına görə” medalına layiq görülüb.
İkinci Qarabağ müharibəsinin ilk günlərindən səfərbərlik çərçivəsində ordu sıralarına qatılan F.Cəbrayılov ehtiyatda olan zabit - baş leytenant, tağım komandiri kimi şərəfli döyüş yolu keçib.
“Medallarla təltif olunan hərbi qulluqçularımızı təbrik edir, şəhidlərimizə Allahdan rəhmət diləyirik!”, - deyə nazirlikdən bildirilib.