Bakı, 3 oktyabr, AZƏRTAC

Dövlət ehtiyatlarına aid olan mallar bir neçə əsasla buraxıla bilər. Bu, malların yeniləşdirilməsi, brondan çıxarılması, borc verilməsi, əvəzləşdirilməsi zamanı mümkündür.

AZƏRTAC xəbər verir ki, bu barədə məsələ Milli Məclisin İqtisadi siyasət, sənaye və sahibkarlıq komitəsinin oktyabrın 3-də keçirilən iclasının gündəliyinə daxil edilən yeni qanun layihəsində öz əksini tapıb.

“Dövlət ehtiyatları haqqında” qanun layihəsinə əsasən, məsul orqan saxladığı fövqəladə ehtiyatların yeniləşdirilməsini və əvəzləşdirilməsini müvafiq icra hakimiyyəti orqanının müəyyən etdiyi orqana (quruma) məlumat verməklə özü həyata keçirir.

Dövlət ehtiyatlarının borc verilməsi dövlət qurumlarının dövlət ehtiyatları üzrə məsul orqana müraciəti əsasında həyata keçirilir. Dövlət ehtiyatlarının borc verilməsinə dair qərar müvafiq icra hakimiyyəti orqanının müəyyənləşdirdiyi orqanla (qurumla) razılaşdırılmaqla dövlət ehtiyatları üzrə məsul orqan tərəfindən qəbul edilir.

Sənəddə borc götürülən malın həcminin həmin malın dövlət ehtiyatındakı ümumi həcminin 30 faizindən, borc müddətinin isə 12 aydan çox ola bilməyəcəyi bildirilir. Həmçinin brondan çıxarılan malların yeniləşdirilə və dəyişdirilə bilməyəcəyi qeyd olunur.