Dövlət qulluğu: məsuliyyət, peşəkarlıq və müasir idarəetmə modeli
Bakı, 23 iyun, AZƏRTAC
Azərbaycan Respublikasının Prezidenti İlham Əliyev dövlət qulluğunu hər zaman xalqa xidmət missiyası kimi dəyərləndirərək bildirib ki, dövlət qulluğunda çalışmaq imtiyaz deyil, böyük məsuliyyətdir. Prezident vurğulayır ki, hər bir dövlət qulluqçusu özünü xalqın xidmətçisi hesab etməli, vətəndaşların qayğıları ilə yaşamalı, onlara diqqət və həssaslıqla yanaşmalıdır. Eyni zamanda, dövlət başçısı vəzifəsindən sui-istifadə edən, vətəndaşlara yuxarıdan aşağı baxan məmurlara qarşı ciddi mübarizə aparılacağını dəfələrlə bəyan edib.
Dövlət qulluğu hər bir ölkənin idarəetmə sisteminin əsas dayaqlarından biridir. Azərbaycanda bu sahədə həyata keçirilən islahatlar dövlət idarəçiliyinin daha şəffaf, çevik və vətəndaşyönümlü qurulmasına xidmət edir. Xüsusilə son illərdə ölkənin ərazi bütövlüyü və suverenliyinin tam bərpasından sonra dövlət idarəçiliyinin modernləşdirilməsi istiqamətində mühüm addımlar atılıb.
Bu fikirləri AZƏRTAC-a açıqlamasında Azərbaycan Respublikasının Prezidenti yanında Dövlət İdarəçilik Akademiyasının Siyasi idarəetmə fakültəsinin dekanı dosent Murtəza Həsənov söyləyib. O bildirib ki, müasir dövlət qulluğu sisteminin əsasları Ümummilli Lider Heydər Əliyev tərəfindən qoyulub. 2001-ci il sentyabrın 1-də "Dövlət qulluğu haqqında" Qanun qüvvəyə minib, sonrakı dövrdə isə Prezident İlham Əliyevin rəhbərliyi ilə bu sahədə ardıcıl islahatlar həyata keçirilib. 2016-cı ildə Dövlət İmtahan Mərkəzinin yaradılması dövlət qulluğuna qəbul prosesinin daha şəffaf və obyektiv əsaslarla təşkilinə imkan verib.
Onun sözlərinə görə, dövlət orqanlarının fəaliyyətinin səmərəliliyi bilavasitə dövlət qulluqçularının peşəkarlığından asılıdır. Son illərdə kadr seçimi, fəaliyyətin qiymətləndirilməsi və insan resurslarının idarə olunması sahəsində tətbiq olunan müasir mexanizmlər dövlət idarəçiliyinin keyfiyyətinin yüksəldilməsinə mühüm töhfə verib. Rəqəmsallaşma prosesinin sürətlənməsi, elektron xidmətlərin genişləndirilməsi və innovativ idarəetmə metodlarının tətbiqi bu sahədə əldə olunan uğurların əsas istiqamətlərindəndir.
Azərbaycan Respublikasında dövlət qulluqçularının peşə bayramı Prezident İlham Əliyevin 25 may 2006-cı il tarixli Sərəncamı ilə təsis edilib. BMT Baş Assambleyasının 23 iyun tarixini Dövlət Qulluğu Günü elan etməsi nəzərə alınaraq, həmin gün ölkəmizdə də dövlət qulluqçularının peşə bayramı kimi qeyd olunur.
Müsahibimiz vurğulayıb ki, müstəqillik illərində hüquqi dövlət quruculuğu istiqamətində aparılan islahatlar nəticəsində dövlət idarəetmə sistemi daha çevik və funksional xarakter alıb. Dövlət orqanlarının fəaliyyət istiqamətləri dəqiqləşdirilib, idarəetmədə şəffaflığın və səmərəliliyin artırılması məqsədilə struktur dəyişiklikləri həyata keçirilib. Dünyada olduğu kimi, Azərbaycanda da rəqəmsal texnologiyalar dövlət idarəçiliyinin əsas inkişaf istiqamətlərindən birinə çevrilib. İnformasiya-kommunikasiya texnologiyalarının inkişafı nəticəsində elektron hökumət sistemi formalaşıb, dövlət xidmətlərinin göstərilməsi daha operativ və əlçatan olub. Prezident İlham Əliyevin 2013-cü ili "İnformasiya-kommunikasiya texnologiyaları ili" elan etməsi bu sahəyə verilən xüsusi diqqətin göstəricisidir.
“Elektron hökumət platforması və "ASAN xidmət" modeli dövlət-vətəndaş münasibətlərində yeni keyfiyyət mərhələsi yaradıb. "ASAN xidmət" dövlət xidmətlərinin vahid məkanda, şəffaf və operativ qaydada göstərilməsini təmin etməklə vətəndaş məmnunluğunun yüksəlməsində mühüm rol oynayır. Bu model artıq beynəlxalq səviyyədə də uğurlu təcrübə kimi qəbul olunur.
Dövlət idarəçiliyində aparılan son islahatlardan biri də əməkhaqqı sisteminin təkmilləşdirilməsi ilə bağlıdır. Prezident İlham Əliyevin 19 mart 2026-cı il tarixli qərarları dövlət qulluqçularının əməkhaqqı sisteminin daha vahid və şəffaf prinsiplər əsasında formalaşdırılmasına yönəlmişdir. Yeni model əməkhaqqının baza maaşı, ixtisas dərəcəsinə görə əlavələr, iş şəraitinə və əlavə iş saatlarına görə ödənişlər əsasında müəyyən edilməsini nəzərdə tutur.
Beynəlxalq təcrübə göstərir ki, dövlət qulluqçularının sabit və şəffaf gəlirlə təmin olunması korrupsiya risklərinin azalmasına, idarəetmədə səmərəliliyin və məsuliyyətin artmasına xidmət edir. Bu baxımdan yeni əməkhaqqı sistemi dövlət sektoruna peşəkar və savadlı kadrların cəlb olunmasına, onların fəaliyyətinin daha səmərəli təşkilinə şərait yaradacaq”, - deyə o əlavə edib.
M.Həsənov qeyd edib ki, bu gün Azərbaycan dövlət qulluğu sistemi müasir idarəetmə prinsiplərinə əsaslanan, peşəkarlığı və şəffaflığı prioritet hesab edən inkişaf mərhələsini yaşayır. Həyata keçirilən islahatlar dövlət idarəçiliyinin daha dayanıqlı və effektiv modelə çevrilməsini təmin edir. Dövlət qulluqçularının peşə bayramı isə bu sahədə çalışan insanların əməyinə verilən yüksək qiymətin ifadəsi olmaqla yanaşı, gələcək inkişaf istiqamətlərinin müəyyənləşdirilməsi baxımından da mühüm əhəmiyyət daşıyır.
Bölmənin digər xəbərləri
