Dünya Bankı Yaxın Şərq və Şimali Afrika üçün iqtisadi artım proqnozunu yüksəldib
Qahirə, 7 oktyabr, AZƏRTAC
Dünya Bankı 2025 və 2026-cı illər üçün Yaxın Şərq və Şimali Afrika regionunun iqtisadi artım proqnozlarını yüksəldib.
AZƏRTAC xəbər verir ki, bankın gözləntilərinə görə, Yaxın Şərq və Şimali Afrika regionlarında inkişaf göstəriciləri 2025-ci ildə 2.8 faiz, 2026-cı ildə isə 3.4 faiz olacaq. İyun ayında bu göstəricilər 2.7 və 3.3 faiz proqnozlaşdırılmışdı. Bankın 2024-cü il üçün hesabatlarında ötən il 2.3 faiz artım nəzərdə tutulurdu. Bu dəyişiklik ticarət fəaliyyətinin artmasının, gömrük rüsumlarında gözləniləndən daha az artımların və maliyyə şəraitinin daha əlverişli olmasının nəticəsidir.
Dünya Bankının Yaxın Şərq, Şimali Afrika, Əfqanıstan və Pakistan üçün “Əmək və qadınlar: istifadə edilməyən istedadlar və əldə olunmayan inkişaf” başlıqlı son hesabatı iqtisadi perspektivlərdə yaxşılaşma olduğunu göstərir. Bununla yanaşı, hesabatda bu ehtiyatlı optimizmə baxmayaraq, dünya üzrə ticarət dəyişiklikləri, münaqişələr və məcburi miqrasiya səbəbi ilə qeyri-müəyyənliyin davam etdiyi vurğulanır.
Hesabatda bildirilir ki, Körfəz Əməkdaşlıq Şurası (KƏŞ) ölkələrində iqtisadi fəaliyyət neft istehsalının könüllü və mərhələli şəkildə azaldılmasından və qeyri-neft sektorunun inkişafından faydalanacaq. 2025-ci ildə bu ölkələrdə iqtisadi artımın 3.5 faiz olacağı gözlənilir. Müqayisə üçün demək olar ki, 2024-cü ildə bu rəqəm 2.2 faiz proqnozlaşdırılmışdı.
Neft idxal edən inkişaf etməkdə olan ölkələrdə isə iqtisadi artımın 2.2 faizdən 3.7 faizə yüksəlməsi gözlənilir. Bu, şəxsi istehlakın və investisiya fəaliyyətinin güclənməsi, kənd təsərrüfatı və turizm sektorlarının yenidən dirçəlməsi, eləcə də iqtisadi islahatlar və xarici yardım ilə əlaqələndirilir.
Qahirə
Bölmənin digər xəbərləri
