Bakı, 13 sentyabr, AZƏRTAC

BMT-nin Ticarət və İnkişaf üzrə Konfransı (UNCTAD) iqlim dəyişikliyi ilə mübarizə, təmiz enerji, səhiyyə, ərzaq təhlükəsizliyi və digər inkişaf ehtiyacları üçün investisiyaları cəlb etmək məqsədilə oktyabrın 16-dan 20-dək Birləşmiş Ərəb Əmirliklərinin (BƏƏ) paytaxtı Əbu-Dabidə Ümumdünya İnvestisiya Forumunu keçirəcək.

AZƏRTAC təşkilatın saytına istinadla xəbər verir ki, tədbir çərçivəsində keçiriləcək 130 sessiyada 160 ölkədən dövlət başçıları, 50 nazir, aparıcı şirkətlərin və birjaların 150-dən çox icraçı direktorları və 7 minə yaxın investor qlobal investisiya axınının canlandırılması məsələlərini müzakirə edəcəklər.

UNCTAD-ın 2023-cü il Dünya İnvestisiya Hesabatına görə, üst-üstə düşən böhranlar 2022-ci ildə qlobal miqyasda birbaşa xarici investisiyaların 12 faiz azalmasına səbəb olub. BƏƏ-nin xarici ticarət üzrə dövlət naziri Tani bin Ahmed Al Zeyudi deib: "Bu, qlobal iqtisadiyyat və xüsusilə Qlobal Cənubun iqtisadiyyatları üçün danılmaz çətin bir məqamdır. Dünyanın üçqat inflyasiya şoku, geosiyasi qeyri-müəyyənlik ilə üzləşdiyi bir vaxtda iqlim dəyişikliyi, rifah və davamlılığın tarazlaşdırılması, innovasiyaların tətbiqi iqtisadiyyatlara böyük həcmdə sərmayələrin qoyulmasını tələb edir”. O əlavə edib ki, forum siyasətçilər və institutlar tərəfindən dəstəklənən qlobal investisiya icması üçün zəruri kapitalı səfərbər etmək, onları ekoloji cəhətdən məsuliyyətli və sosial baxımdan faydalı inkişafı sürətləndirə bilən layihələrə yönəltmək üçün əlverişli məqam təqdim edir.

UNCTAD-ın Baş katibi Rebeka Qrinspen forum ərəfəsində bildirib: "Çoxsaylı qlobal böhranlar fonunda təcili olaraq bütün dünyada fəaliyyətə başlamaq, daha çox vəsait cəlb etmək və onları bu böhranların təsirlərini azaltmaq üçün vacib sektorlara yönəltmək üçün investisiyada maraqlı tərəflərə ehtiyacımız var". Onun sözlərinə görə, forum iştirakçıları 2023-cü ilin Dünya İnvestisiya Hesabatında göstərilən aşağı karbonlu enerjiyə keçid üçün hər il 2,2 trilyon ABŞ dolları investisiya boşluğu ilə üzləşən inkişaf etməkdə olan ölkələrdə təmiz enerji investisiyalarını artırmaq məqsədilə hazırlanmış tədbirlər Planı üzrə razılığa gələcəklər.

Qlobal davamlı maliyyə bazarının dəyəri (istiqrazlar və fondlar) 2022-ci ildə yüksək inflyasiya, artan faiz dərəcələri, zəif bazar gəlirləri və yaxınlaşan tənəzzül riski də daxil olmaqla, təlatümlü iqtisadi mühitə baxmayaraq, 5,8 trilyon dollara çatıb. Forumda səhiyyəyə investisiyaların artırılması imkanları da araşdırılacaq. Təkcə inkişaf etməkdə olan ölkələrin səhiyyə müəssisələri və infrastrukturunun hər il ən azı 100 milyard dollar əlavə investisiyaya ehtiyacı var. Bununla yanaşı, ölkələrin növbəti onillikdə kənd təsərrüfatı və ərzaq sistemlərini dəyişdirmək üçün hər il 350 milyard dollara qədər vəsaitə ehtiyacı var ki, bu da iqlim dəyişikliyi və biomüxtəlifliyin itirilməsi ilə mübarizə aparmağa kömək edə bilər.