Əczaçılıq sektorunun rəqəmsallaşdırılmasına dair sənədlər təsdiq üçün təqdim olunub
Bakı, 26 dekabr, AZƏRTAC
Səhiyyə sisteminin inkişafı ölkəmizdə prioritet məsələlərdən biridir. Bu il Səhiyyə Nazirliyi tərəfindən respublikamızda səhiyyə infrastrukturunun daha da möhkəmləndirilməsi istiqamətində zəruri addımlar atılıb. Prezident İlham Əliyevin müvafiq Fərmanı ilə Səhiyyə Nazirliyinə səhiyyə sisteminin iştirakçılarını və aidiyyəti dövlət qurumlarını cəlb etməklə “Səhiyyənin Transformasiyası Mərkəzi” işçi qrupunu yaratmaq tapşırılıb. İşçi qrupu tərəfindən səhiyyə və tibbi sığorta sahəsində normativ hüquqi bazanın təkmilləşdirilməsinə, elektron səhiyyənin inkişaf etdirilməsinə dair sənəd layihələri hazırlanaraq aidiyyəti üzrə təqdim olunub.
Səhiyyə Nazirliyinin mətbuat xidmətindən AZƏRTAC-a bildirilib ki, bunu səhiyyə naziri Teymur Musayev 2022-ci ilin yekunlarına həsr olunmuş iclasda deyib.
Nazirin sözlərinə görə, bundan əlavə, Azərbaycanda əczaçılıq sektorunun dayanıqlı inkişafının təmin edilməsi məqsədilə Nazirlər Kabinetinin müvafiq Sərəncamı ilə yaradılmış Komissiyanın katibliyi Səhiyyə Nazirliyinə tapşırılıb. Sərəncamda qeyd olunan tapşırıqların icrası məqsədilə dərman vasitələrinin qeydiyyatı prosesi, sektorun rəqəmsallaşdırılması üzrə beynəlxalq təcrübə araşdırılaraq hazırlanmış sənəd toplusu aidiyyəti qurumlarla razılaşdırılaraq təsdiq üçün təqdim olunub.
Bölmənin digər xəbərləri
