Ədəbiyyat Muzeyində tədbir: Mənim ana dilim - mənim kimliyim
Bakı, 20 fevral, AZƏRTAC
Nizami Gəncəvi adına Milli Azərbaycan Ədəbiyyatı Muzeyində 21 Fevral - Beynəlxalq Ana Dili Gününə həsr olunmuş “Mənim ana dilim - mənim kimliyim” adlı ədəbi-bədii tədbir keçirilib.
AZƏRTAC xəbər verir ki, tədbiri açan muzeyin direktoru akademik Rafael Hüseynov Beynəlxalq Ana Dili Gününün yaranma tarixindən danışıb, bu əlamətdar günün dünyada geniş qeyd olunduğunu diqqətə çatdırıb. Hazırda dünyada 7 mindən çox canlı dilin mövcud olduğunu söyləyən direktor onlardan bəzilərinin geniş yayılmasının səbəbinin bu dilin vətəni olan ölkələrin imperiya keçmişi ilə bağlı olduğunu vurğulayıb. Bildirib ki, müxtəlif dillər dünyadakı mədəniyyətlərin ifadəsidir. Dil məhv olarsa, onlarla birlikdə bütöv bir mədəniyyət də məhv olar.
Akademik Rafael Hüseynov qeyd edib ki, milli-mənəvi dəyərlərimiz sırasında xüsusi yeri olan Azərbaycan dili tarixən həm zəngin inkişaf yolu keçib, həm də müəyyən vaxtlarda ciddi təsir və təzyiqlərə məruz qalıb. O, dilimizin inkişafına dövlət səviyyəsində ilk qayğının Azərbaycan Xalq Cümhuriyyəti dövründə göstərildiyini söyləyib. Qeyd edib ki, təhsil sisteminin milli zəmin əsasında qurulmasında 1918-ci il iyunun 27-də Azərbaycan dilinin dövlət dili elan olunması və avqustun 28-də məktəblərin milliləşdirilməsi haqqında qərarın qəbul edilməsinin mühüm əhəmiyyəti olub. Lakin Cümhuriyyətin ömrü uzun olmadığından dil haqqında tədbirlər də milli əsaslarla davam edə bilməyib, Azərbaycanda sovet hakimiyyətinin yaranması ilə bu tədbirlərə son qoyulub.
“Xalqın varlığının ifadə forması olan ana dili hər bir millətin maddi və mənəvi irsini qoruyan, gələcəyə çatdıran ən güclü vasitədir. Tarixin sərt sınaqlarından üzüağ çıxan dilimiz bu gün dünyanın ən inkişaf etmiş dillərindən biridir. Azərbaycan dili ulu babalarımızdan bizə miras qalan milli sərvətimizdir”, - deyə akademik Rafael Hüseynov əlavə edib.
XX əsrdə Azərbaycan dilinin daha da inkişaf etdiyini söyləyən alim məhz bu dövrdə dilimizin funksional imkanlarının genişləndiyini, üslublarının zənginləşdiyini vurğulayıb. O, ana dilimizin öz qüdrətini qorumasında, işlək dilə çevrilməsində Ulu Öndər Heydər Əliyevin müstəsna xidmətlərini xüsusi qeyd edib. Rafael Hüseynov Ümummilli Lider Heydər Əliyevin Azərbaycan dilini çox sevdiyini və bu dildə danışmaqdan zövq aldığını xatırladıb. Direktor vurğulayıb ki, Ümummilli Liderin ana dilimizə həssas münasibəti Prezident İlham Əliyevin apardığı dil siyasətində də davam etdirilir. Bunu Prezidentin dilimizin inkişaf etdirilməsi ilə bağlı qəbul etdiyi qərarlar və imzaladığı sərəncamlar bir daha təsdiqləyir. Azərbaycan dilinin bugünkü səviyyəsi xalqımızın ən qədim, dərin tarixi köklərə malik xalq olduğundan xəbər verir.
“Ana dili ana qədər doğma, əziz və dəyərlidir”, - deyə bildirən akademik Rafael Hüseynov ana dilinin saflığının qorunması və gələcək nəsillərə ötürülməsinin önəminə toxunub. O, dilimizi yad ünsürlərdən qorumağın, dilin tədrisi məsələsinə ciddi yanaşmağın zəruriliyini qeyd edib, Beynəlxalq Ana Dili Günü münasibətilə tədbir iştirakçılarını təbrik edib.
Daha sonra Beynəlxalq Ana Dili Gününə həsr olunan videoçarx nümayiş etdirilib.
Bədii hissə ilə davam edən tədbirdə Bakı şəhər 3 nömrəli Uşaq-Gənclər İnkişaf Mərkəzinin şagirdləri “Ana dilim” mövzusunda şeirlər səsləndiriblər. Həmçinin məktəblilərin ifasında musiqi nümunələri təqdim olunub.
Bölmənin digər xəbərləri
