Efiopiya Azərbaycan ilə hərtərəfli əməkdaşlıqda maraqlıdır
Bakı, 1 noyabr (AZƏRTAC). Noyabrın 1-də Milli Məclisin sədri Oqtay Əsədov Üçüncü Bakı Beynəlxalq Humanitar Forumunda iştirak etmək üçün Azərbaycana səfərə gəlmiş Efiopiya Federal Demokratik Respublikasının parlamentinin sədri Abadulla Gemeda Dagon ilə görüşmüşdür.
AZƏRTAC xəbər verir ki, qonağı səmimiyyətlə salamlayan Milli Məclisin sədri Azərbaycan xarici siyasətində Afrika ölkələri ilə əlaqələrə önəm verdiyini bildirmişdir. Diqqətə çatdırmışdır ki, rəsmi Bakı Efiopiya ilə iqtisadi və siyasi əlaqələr qurmaqda maraqlıdır. Bu əlaqələrin qurulması və əməkdaşlıq üçün qarşılıqlı səfərləri artırmaq və parlamentlərarası münasibətləri möhkəmləndirmək lazımdır.
Bildirilmişdir ki, hər iki dövlətin başçıları qarşılıqlı faydalı əməkdaşlıq üçün siyasi iradəyə malikdirlər.
Səmimi görüşə görə təşəkkürünü bildirən Abadulla Gemeda Dagon Üçüncü Bakı Beynəlxalq Humanitar Forumunun yüksək səviyyədə təşkil olunduğunu, burada müzakirəyə çıxarılan məsələlərin bütün iştirakçı dövlətlər üçün faydalı olacağına əminliyini ifadə etmişdir.
Azərbaycan ilə qarşılıqlı faydalı əməkdaşlıq əlaqələrinin qurulmasında ölkəsinin maraqlı olduğunu deyən qonaq bu istiqamətdə lazımı addımların atılacağını bildirmişdir.
Görüşdə qarşılıqlı maraq doğuran məsələlər ətrafında fikir mübadiləsi aparılmışdır.
Bölmənin digər xəbərləri
