Ekspert: AzTV əməkdaşlarına hücum Fransada media azadlığına münasibətin göstəricisidir
Bakı, 29 iyun, AZƏRTAC
Azərbaycan Televiziya və Radio Verilişləri Qapalı Səhmdar Cəmiyyətinin əməkdaşları Fransada çəkiliş apararkən hücuma məruz qalıblar. Nəticədə müxbir və operator bədən xəsarətləri alıblar, çəkiliş kamerası sındırılıb. Əməkdaşlar kameranı geri tələb edərkən onları silahla hədələyiblər. Azərbaycan media ictimaiyyəti olaraq bu faktı kəskin şəkildə pisləyirik. Fransa dövlətindən, bu ölkənin hüquq-mühafizə orqanlarından baş vermiş insidenti obyektiv araşdırmağı, jurnalistlərə silahlı hücum edən şəxslərin müəyyənləşdirilməsini və cəzalandırılmasını, həmçinin dəymiş zərərin ödənilməsini tələb edirik. Bununla yanaşı, faktın lazımi səviyyədə araşdırılacağına, dəyərləndirəcəyinə və hüquqi ölçü götürüləcəyinə inam azdır.
Bu fikri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
“Təcrübə göstərir ki, Fransanın mövcud hakimiyyəti və hüquq-mühafizə orqanları öz ərazilərində baş vermiş media insidentlərini nəinki sona qədər araşdırıb hüquqi ölçü götürmürlər, əksinə, bu kimi faktların gizlədilməsinə, unudulmasına çalışırlar.
Söz və ifadə azadlığına qarşı belə yanlış münasibət Emanuel Makron hakimiyyəti üçün xarakterik hal alıb, tendensiyaya çevrilib. Nümunə olaraq xatırladım ki, 2020-ci ildə Fransada fəaliyyət göstərən “TF1” kanalı və onun müxbiri Liseron Boudoula Azərbaycan həqiqətlərini dilə gətirdiyinə, erməni lobbisinin yalanlarını ifşa etdiyinə görə Parisdə hücuma məruz qalmışdı. Fransadakı erməni lobbisinin təmsilçiləri Liseron Boudoulanı ölümlə hədələyirdilər. Həmin dövrdə dəfələrlə müraciətlər ünvanlanmasına baxmayaraq, Fransa hökuməti fakta lazımi diqqət göstərmədi, cinayətkarları cəzalandırmadı.
Vurğulamaq zəruridir ki, bənzər yanaşma təkcə ölkəmizin KİV-lərinə qarşı, yaxud Azərbaycan həqiqətlərini işıqlandıran Fransa media nümayəndələrinə qarşı sərgilənmir. Bu ölkədə media təmsilçilərinə qarşı törədilmiş və araşdırılaraq hüquqi qiymət almamış insidentlərə dair çoxsaylı faktlar mövcuddur. 2019-cu ildə Fransada “sarı jiletlilər” hərəkatı keçirilərkən 100-dən çox jurnalist cərimələndi, təhdid aldı və ya həbsə salındı. Beynəlxalq təşkilatların ciddi etirazına baxmayaraq, jurnalistlərə qarşı basqılar davam etdirildi. Onların həqiqəti işıqlandırmalarına manelər törədildi”,- deyə media ekspert qeyd edib.
O əlavə edib ki, paralel olaraq, E.Makron hakimiyyəti media azadlığına qarşı ən pis qanunları qəbul etmiş komanda kimi də diqqət mərkəzinə gəlib. Onun komandasının təşəbbüsü ilə gündəmə gətirilmiş “Qlobal təhlükəsizlik qanunu” Avropada media azadlığını məhdudlaşdıran ən pis qanun kimi tarixə yazılıb. Bu və digər faktlara söykənərək demək olar ki, Fransada son illərdə media azadlığına qarşı ciddi bir proses mövcuddur və AzTV əməkdaşlarına qarşı törədilmiş insident də bu sahədə bir nümunədir.
Təəssüf doğuran hal odur ki, Fransada yerləşən beynəlxalq statuslu jurnalist təşkilatları da sadalanan faktlara laqeyd yanaşırlar. Onlar siyasi konyukturadan çıxış edərək, Fransanın imicinə xələl gətirən faktları ictimailəşdirməkdən yayınırlar. Bu sırada “Sərhədsiz Reportyorlar” təşkilatının fəaliyyəti pis örnək yaradır. Azərbaycanda və dünyanın müxtəlif ölkələrində baş verən ən xırda insidentlər ətrafında kampaniya yaradan “Sərhədsiz Reportyorlar” Fransanın özündə baş verən, media azadlığını məhdudlaşdıran insidentlərə laqeyd yanaşır, Fransanın yalançı demokratik imicini möhkəmləndirməyə çalışanlar sırasında yer tutur.
Bütün bunları nəzərə alsaq, deyə bilərik ki, AzTV əməkdaşlarına hücum Fransada media azadlığına münasibətin göstəricisidir.
Bölmənin digər xəbərləri
