Ekspert: Novruz bayramı Azərbaycanın turizm potensialını gücləndirən amillərdən biridir
Bakı, 22 mart, AZƏRTAC
Novruz bayramı yalnız qədim ənənələrin yaşadıldığı mədəni hadisə deyil, eyni zamanda, Azərbaycanın turizm sektorunun inkişafına töhfə verən amillərdən biridir.
Bunu AZƏRTAC-a açıqlamasında turizm üzrə türkiyəli ekspert Adnan Zamburkan bildirib. Onun sözlərinə görə, bu bayram həm yerli, həm də xarici turistlər üçün cəlbedici mədəni platforma rolunu oynayır.
Ekspert qeyd edib ki, Azərbaycanın zəngin folkloru, milli mətbəxi və rəngarəng mərasimləri Novruz günlərində özünün ən parlaq təzahürünü tapır. Xüsusilə tonqal mərasimləri, Kosa-Keçəl tamaşaları, səməni ənənəsi və milli şirniyyatların təqdimatı ölkəyə gələn turistlər üçün unudulmaz anlar yaradır. Bu baxımdan Novruz Azərbaycanın beynəlxalq turizm imicinin formalaşmasında mühüm “yumşaq güc” aləti kimi çıxış edir və mədəni diplomatiyanın effektiv vasitəsinə çevrilir.
Adnan Zamburkan vurğulayıb ki, Novruz ərəfəsində turistlərin Azərbaycana cəlb olunması üçün yaradılan şərait – sadələşdirilmiş viza prosedurları, elektron viza sisteminin əlçatanlığı və beynəlxalq aviareyslərin genişləndirilməsi – ölkəyə giriş imkanlarını əhəmiyyətli dərəcədə artırır. Müxtəlif ölkələrdən gələn turistlər üçün də Azərbaycan cəlbedici istiqamətə çevrilir. Bu dinamika hotellərin doluluq səviyyəsinin yüksəlməsi, iaşə və xidmət sektorunda dövriyyənin artması ilə müşayiət olunur.
Ekspertin fikrincə, turizm şirkətləri və hotellər tərəfindən təqdim olunan Novruz paketləri, endirim kampaniyaları və mədəni proqramlar turistlərin seçimlərinə birbaşa təsir edir. Bakı ilə yanaşı, Şəki, Qəbələ, Quba və Lənkərana təşkil edilən turlar xarici qonaqların marağını artırmaqla ölkədaxili turizmin balanslı inkişafına xidmət edir. Regionlarda keçirilən tematik festivalların miqyası genişləndirildikcə və proqramlar daha peşəkar şəkildə qurulduqca turistlərin ölkədə qalma müddəti də artır, bu isə ümumi iqtisadi səmərəliliyə birbaşa müsbət təsir göstərir.
A.Zamburkan Azərbaycan və Türkiyənin turizm sektorlarını müqayisə edərək bildirib ki, Türkiyə uzun illər ərzində formalaşmış infrastrukturu, geniş hotel şəbəkəsi və Aralıq dənizi hövzəsində yerləşən kurortları ilə qlobal turizm bazarında lider mövqelərdən birini tutur. Azərbaycan isə daha çox mədəni, etnoqrafik, kənd və ekoturizm istiqamətləri ilə fərqlənir. Onun sözlərinə görə, Novruz kimi qədim bayramların autentik və canlı şəkildə təqdim olunması Azərbaycanın “təcrübə turizmi” seqmentində rəqabət qabiliyyətini artırır və ölkəni fərqli istiqamət kimi ön plana çıxarır.
Turizm eksperti əlavə edib ki, Yaxın Şərqdə baş verən geosiyasi hadisələr Novruz ərəfəsində turist axınlarına qismən təsir göstərir. Regionda artan gərginlik, təhlükəsizlik riskləri və bəzi istiqamətlər üzrə uçuş məhdudiyyətləri turistlərin səyahət seçimlərinə yenidən baxmasına səbəb olur. Məhz belə şəraitdə sabitlik və təhlükəsizlik amili daha çox ön plana çıxır və bu baxımdan Azərbaycan alternativ və etibarlı turizm istiqaməti kimi diqqət çəkir.
Adnan Zamburkanın qənaətinə görə, yaranmış vəziyyət Azərbaycanın turizm siyasətində daha çevik və hədəfli yanaşmanın tətbiqini zəruri edir. Novruz bayramının beynəlxalq səviyyədə daha geniş tanıdılması üçün rəqəmsal platformalarda fəal təşviqat aparılmalı, xarici media və turizm sənayesi ilə əməkdaşlıq genişləndirilməli, eyni zamanda, regionlarda təşkil olunan festivalların miqyası və keyfiyyəti artırılmalıdır. Ekspert hesab edir ki, nəqliyyat-logistika imkanlarının genişləndirilməsi, xidmət sektorunda keyfiyyət standartlarının yüksəldilməsi və fərdiləşdirilmiş turizm paketlərinin hazırlanması turistlərin məmnunluğunu artırmaqla yanaşı, onların ölkəyə təkrar səfərlərini də stimullaşdıracaq.
Müsahibimiz vurğulayıb ki, Azərbaycan ilə Türkiyə arasında turizm sahəsində əməkdaşlığın daha da gücləndirilməsi, ortaq turizm marşrutlarının və paketlərinin hazırlanması hər iki ölkə üçün əlavə imkanlar yarada bilər. Bu cür əməkdaşlıq regional turizm bazarında rəqabət qabiliyyətini artırmaqla yanaşı, turistlərə daha zəngin və çoxşaxəli təcrübə təqdim etməyə imkan verər.
Müxbir-Vüqar Qurbanoğlu
Bölmənin digər xəbərləri
