ƏLİ BAYRAMLI ŞƏHƏRİ İCRA HAKİMİYYƏTİNİN BAŞÇISI MƏRDAN CAMALOVUN ÇIXIŞI
-Möhtərəm cənab Prezident!
Hörmətli konfrans içtirakçıları!
50 ilə yaxın tarixi olan Əli Bayramlının sənaye, neft və energetika şəhəri kimi formalaşması, inkişafı, dirçəlişi ümummilli liderimiz Heydər Əliyevin adı ilə bağlıdır. Şəhərimizin əhalisi böyük iftixar və qürurla Əli Bayramlını ulu öndərimizin yadigarı kimi qəbul edir.
Möhtərəm cənab Prezident!
Məhz Sizin rəhbərliyiniz altında, respublikanın hər bir bölgəsi kimi Əli Bayramlı şəhəri də bu gün intensiv inkişaf mərhələsinə qədəm qoymuş, sözün əsl mənasında yeniləşmiş, ötən əsrin 70-80-ci illərində olduğu kimi, nadir sənaye və energetika şəhərinə çevrilməkdədir.
Fəaliyyəti 15 il əvvəl dayanmış və uçulub sökülməkdə olan “Telemexanika” zavodu diqqət və qayğınız, qəbul etdiyiniz qərarlara əsasən yenidən qurularaq, ən müasir texnoloji avadanlıqla təchiz edilərək işini bərpa etmiş, cənab Prezident, Sizin sözlərinizlə desək: “Ölkəmizin hərbi gücünü artıran” müəssisələrin sırasına daxil olmuşdur.
Ölkənin energetika qüdrətinin artırılmasına, regionun davamlı elektrik enerjisi ilə təminatına xidmət edəcək yeni müəssisələr sırasına təməli xeyir-duanızla qoyulan, 780 meqavat gücündə “Cənub” İstilik Elektrik Stansiyasında tikinti-quraşdırma işləri sürətlə davam etdirilir. Bu stansiya həm də 50 il əvvəl inşa edilmiş və öz istismar müddətini başa vurmaq üzrə olan, yüzlərlə peşəkar və ixtisaslaşmış energetikin işlədiyi Əli Bayramlı İstilik Elektrik Stansiyasını əvəz edəcəkdir.
Sahibkarlığa göstərdiyiniz qayğı və diqqət, onun inkişafına yaradılan münbit şərait şəhərimizdə özəl sektorun inkişafına da güclü təkan vermişdir. Təkcə keçən il istehsal olunmuş 232 milyon manatlıq sənaye məhsulunun 57 faizi özəl bölmənin payına düşmüşdür. Burada ildə 12 min ton xam pambıq emal etmək gücünə malik zavod, 20 min tondan çox pambıq çiyidi emal edən müəssisə, 3,5 milyon ədəd kərpic hazırlayan zavod tikilib istifadəyə verilmişdir.
Regionların sosial-iqtisadi inkişafı Dövlət proqramında nəzərdə tutulmuş və sərəncamlarınızla qəbul olunmuş digər tədbirlərin hamısı müvəffəqiyyətlə yerinə yetirilmişdir. Nəticədə 2003-cü ilə nisbətən 2007-ci ildə ümumi məhsul buraxılışı 2,3 dəfə, sənaye məhsullarının həcmi 2,2 dəfə, əhalinin pul gəlirləri isə 2,1 dəfə artmışdır. Şəhərdə dörd ildə 7 mindən çox yeni iş yeri açılmışdır ki, onun da 4 minə yaxını daimidir.
Bu gün Əli Bayramlı şəhərinin sakinləri sənaye şəhərinə məxsus ənənəvi həyat tərzi yaşayırlar. Sizin həyata keçirdiyiniz tədbirlər, göstərdiyiniz misilsiz kömək və qayğı nəticəsində əhalinin sosial əhəmiyyətli sifarişlərinə daxil olan problemlər də öz həllini tapır. Əli Bayramlı sakinləri adından qürur hissi ilə bildirirəm ki, möhtərəm cənab Prezident, şəhər mühitini onlara Siz qaytarmısınız!
Şəhərimiz hazırda fasiləsiz elektrik enerjisi ilə təmin edilir, təbii qazla bağlı problemlərin həllində böyük işlər görülür. Sizin göstərişinizlə “Qarasu” əməliyyat şirkətinin neft mədənlərinin səmt qazı 5 mindən artıq əhalisi olan “Kənd yerləri” yaşayış massivinə verilmişdir. “Şirvan OYL” neft mədənlərinin səmt qazı ilə 2500 nəfərdən artıq əhalisi olan Bayramlı qəsəbəsi təchiz edilir. Tapşırığınıza uyğun olaraq, mürəkkəb mühəndis, tikinti-quraşdırma işləri aparılaraq, qaz xətti Kür çayının altından keçməklə çəkilmişdir.
Sizin göstərişinizlə tikilmiş və ən müasir tibbi avadanlıqla təchiz edilmiş müasir Müalicə-Diaqnostika Mərkəzinin dünya standartlarına uyğun xidmətlərindən təkcə şəhər sakinləri deyil, həm də regionun digər bölgələrinin əhalisi də istifadə edir və Sizə öz hədsiz minnətdarlıqlarını bildirirlər.
Möhtərəm cənab Prezident!
Xalqda belə bir yekdil fikir formalaşmışdır ki, kiçik və böyüklüyündən asılı olmayaraq insanların rifahı ilə bağlı hər bir məsələ, cənab Prezidentin eyni dərəcədə diqqətində və nəzarətindədir. 2001-ci ildə baş vermiş zəlzələ nəticəsində Çılpaqlı yaşayış massivində ciddi zədələnmiş məktəb binasının əvəzinə yenisinin inşası üçün şəhər ictimaiyyəti nümayəndələrinin Sizə müraciətini nəzərə alaraq həmin orta məktəb üçün yeni binanın tikilməsi haqqında Sərəncam imzaladınız və Prezident Fondundan 1,3 milyon manat vəsait ayırdınız. Bu gün də Əli Bayramlıda böyük ehtiram və məhəbbətlə danışılır ki, cənab Prezident verdiyi taşırığın icrasını şəxsən özü gəlib yoxladı və bir il müddətində 3 korpusdan, 33 sinif otağından ibarət məktəb binası yüksək keyfiyyətlə tikilib istifadəyə verildi. Minnətdarıq ki, məktəbin açılışında, cənab Prezident, Siz və Heydər Əliyev Fondunun prezidenti, Milli Məclisin deputatı Mehriban xanım Əliyeva iştirak etdiniz.
Yeri gəlmişkən qeyd etməliyəm ki, Sizin köməyiniz və Heydər Əliyev Fondunun təşəbbüsü ilə son üç ildə 2320 şagird yeri olan 4 məktəb binası tikilməklə şəhərdə bütün şagirdlərin 17,7 faizinin təlim və tədris bazası yeniləşmiş, iki və üç növbədə oxuyanların xüsusi çəkisi 14 faiz azalmışdır. Leysan yağışları nəticəsində şəhər təsərrüfatına və əhaliyə dəyən ziyanın aradan qaldırılması üçün ayırdığınız 2 milyon manat vəsait və daxili imkanlar hesabına, qısa müddətdə 120 ailə üçün beşmərtəbəli 2 yaşayış binasında, 2 uşaq bağçasında bərpa-gücləndirmə işləri aparılmış, tamam dağılmış 5 fərdi ev tikilmiş, şəhərdaxili yollar, sel sularından qorunmaq üçün bənd və kanallar bərpa edilmişdir. Şəhər sakinləri bu gün də həmin çətin anlarda onlara göstərdiyiniz qayğını, dəstəyi unutmurlar.
Əli Bayramlı şəhəri öz xoşbəxt günlərini yaşayır, sakinlər böyük ümidlərlə öz Prezidentinin rəhbərliyi altında sabaha doğru inamla addımlayırlar. Cənab Prezident, Sizi əmin edirəm ki, bundan sonra da qarşıda qoyduğunuz bütün vəzifələr əzmlə yerinə yetiriləcəkdir.
Diqqətinizə görə sağ olun!
Bölmənin digər xəbərləri
