Elmi katib: Üzeyir Hacıbəylinin ev-muzeyi milli musiqi mədəniyyətimizin canlı yaddaşıdır
Bakı, 5 fevral, AZƏRTAC
Azərbaycan musiqisinin beşiyi sayılan Üzeyir Hacıbəylinin ev-muzeyi bizim üçün sadəcə bir tarixi məkan deyil, milli musiqi mədəniyyətimizin canlı yaddaşıdır. Bu evdə Üzeyir Hacıbəyli uzun illər yaşamış, yaradıcılığının ən məhsuldar dövrlərini məhz burada keçirib. Onun bir çox məşhur və ölməz əsərləri bu divarlar arasında ərsəyə gəlib. Məhz bu evdə Azərbaycan Respublikasının Dövlət Himni, “Sənsiz”, “Sevgili canan” kimi məşhur romanslar, eləcə də “Koroğlu” operası kimi möhtəşəm sənət nümunələri formalaşıb və bəstələnib. Muzey fəaliyyət göstərdiyi müddət ərzində Azərbaycan və dünya musiqi mədəniyyətinə böyük töhfələr vermiş bəstəkarların, alimlərin və ictimai xadimlərin diqqətini daim cəlb edib.
Bunu AZƏRTAC-a açıqlamasında Üzeyir Hacıbəylinin ev-muzeyinin elmi katibi Nərgiz Qədirova deyib.
O bildirib ki, 1975-ci il noyabrın 20-də açılmış muzey ötən il 50 illik yubileyini qeyd edib. Bu münasibətlə dahi bəstəkarın həyatına, yaradıcılığına dair maraqlı faktlar, elmi mühazirələr və ictimai görüşlər təşkil olunub. Son 50 il ərzində muzey yalnız eksponat nümayiş etdirməklə kifayətlənməyib, eyni zamanda, muzey əməkdaşları Üzeyir Hacıbəylinin irsinin tədqiqi üçün elmi araşdırmalar aparıb, monoqrafiyalar, kitablar və elmi məqalələr nəşr etdiriblər. Həm muzey daxilində, həm də kənarda keçirilən tədbirlərdə, sərgilərdə bu irs geniş təbliğ olunub. Həmçinin müxtəlif ölkələrdən muzeyi ziyarət edənlər arasında məşhur şəxsiyyətlərin imzalarına rast gəlmək mümkündür ki, bu da Üzeyir bəyin dünya miqyasında tanınmasının göstəricisidir.
“Üzeyir Hacıbəylinin ev-muzeyinin ekspozisiyası memorial və elmi prinsiplər əsasında qurulub. Muzey bir neçə əsas otaqdan ibarətdir və hər otaq bəstəkarın həyatının və yaradıcılığının ayrı-ayrı mərhələlərini əks etdirir. Muzey artıq yarım əsrdir ki, Azərbaycan milli musiqi mədəniyyətinin qorunması, tədqiqi və təbliği istiqamətində mühüm missiyanı yerinə yetirir. Bu məkan təkcə dahi bəstəkarın yaşadığı ev deyil, eyni zamanda, onun yaradıcılıq dünyasını, mənəvi irsini və milli musiqi məktəbinin formalaşma yolunu əks etdirən canlı mədəni yaddaşdır. Muzeyin ekspozisiyasında nümayiş etdirilən hər bir otaq, hər bir eksponat Üzeyir Hacıbəylinin sənətə, xalqa və gələcək nəsillərə ünvanlanan böyük xidmətinin təcəssümüdür”, - deyə Nərgiz Qədirova qeyd edib.
Bölmənin digər xəbərləri
