ELMİ ŞURANIN İCLASI KEÇİRİLMİŞDİR

23.11.2005 [18:23]
Çap et
A⁺ A^-

AZƏRTAC xəbər verir ki, noyabrın 23-də Azərbaycan Milli Elmlər Akademiyası İnformasiya Texnologiyaları İnstitutu kibernetika, informasiya texnologiyaları və texnika üzrə problem şurasının növbəti iclası keçirilmişdir.

İclasda akademik İsmayıl İbrahimov müzakirə olunacaq məsələlər haqqında məlumat vermişdir.

AMEA-nın İnformasiya Texnologiyaları İnstitutunun direktoru Rasim Əliquliyev Tunisdə keçirilmiş İnformasiya Cəmiyyəti üzrə Dünya Sammitinin ikinci mərhələsi barədə danışaraq bildirmişdir ki, Dünya Sammitinin Cenevrədə keçirilən birinci mərhələsindən ötən iki ilə yaxın müddətdə Azərbaycanda informasiya-kommunikasiya texnologiyalarının inkişafı daim diqqət mərkəzində olmuş, ölkə başçısının qayğısı sayəsində bu sahədə böyük nailiyyətlər əldə edilmişdir. R.Əliquliyev sammitdə ölkəmizdə informasiya-kommunikasiya texnologiyalarının inkişafını əks etdirən audio və videomateriallarının nümayiş olunduğunu, “Azərbaycan günü” və digər tədbirlərin keçirildiyini diqqətə çatdırmışdır.

İclasda Azərbaycanın elmi tədqiqat və ali təhsil müəssisələrində 2006-2008-ci illər üçün elmi tədqiqat işləri planı müzakirə olunmuşdur.