Əlverişli hava şəraiti Biləsuvarda taxılçılığa müsbət təsir göstərir VİDEO
Biləsuvar, 25 yanvar, İsmayıl Cəfərli, AZƏRTAC
Biləsuvarda bu il üçün payızlıq əkin aparılan 36 min 800 hektar taxıl sahəsində yüksək keyfiyyətli çıxış əldə edilib. Bunu rayonun Bitki Mühafizəsi və Fumiqasiya Mərkəzinin mütəxəssislərinin taxıl sahələrində apardıqları fitosanitar müşahidələri deməyə əsas verir.
AZƏRTAC xəbər verir ki, rayon iqtisadiyyatının əsasını təşkil edən taxılçılıq hər il keyfiyyət və məhsuldarlıq baxımından inkişaf etdirilir. Bu il rayonda dənli bitkilərin əkin sahəsi min hektara yaxın artırılaraq, 36 min 800 hektara çatdırılıb. Bunun 11 min hektarı buğda, 26 min hektarı isə arpa bitkisidir. İstehsalçıların vaxtında apardıqları keyfiyyətli şum, aqrotexniki tədbirlər, yüksək reproduksiyalı toxumlardan istifadə edilməsi bol məhsulun əldə olunacağına zəmin yaradır. Bitki Mühafizəsi Mərkəzinin mütəxəssisləri tərəfindən payızlıq taxıl əkininin 30 min 400 hektarı yaxşı, 5 min 600 hektarı isə orta qiymətləndirilib.
Bitki Mühafizəsi Mərkəzinin rəisi Yusif Vəliyev: “2023-cü ilin məhsulu üçün 36800 hektar sahədə taxıl əkilib. Həmin taxıl sahələrində Bitki və Mühafizə Mərkəzinin işçiləri, mütəxəssisləri müşahidə işləri aparıb, lakin müşahidə nəticəsində, hələlik heç bir zərərverici xəstəlik aşkar olunmayıb. Ona görə də biz müşahidə işlərimizi davam etdiririk. Taxıl sahələrində hazırda suvarma işləri gedir. Suvarma işlərinin əsas məqsədlərindən biri də siçanabənzər gəmiricilərin qarşısını almaq üçündür. Məlumat üçün deyirəm ki, 2019-2020-ci illərdə biz həmin sahələrdə siçanabənzər gəmiricilər yüksək olduğu üçün keyfiyyətli mübarizə işləri aparmışıq. Bunun nəticəsində 2021-2022-ci illərdə həmin sahələrdə müşahidə işləri apardığımız zaman zərərverici xəstəliklər olmamışdır”.
Baş aqronom Mirzəxan İbayev: “Vaxtında əkin işləri görülüb. Sahə kollanma fazasındadır. Qarın yağması məhsuldarlığa müsbət təsir göstərəcək”.
İstehsalçılar da ötən illərlə müqayisədə mövsümə uyğun qarlı-şaxtalı iqlim şəraitinin hökm sürməsini taxılçılığa mütləq faydalı olacağını bildirir.
İki hektar sahədə taxıl əkini apardığını söyləyən fermer Hökməli Eynullayev deyib: “Havanın yaxşı olması ilə əlaqədar taxıl sahəsində gözəl çıxış alınıb. Havaların əlverişli keçməsi taxılın inkişafı üçün yaxşı olub, hazırda kollanma mərhələsindədi. Qarın şaxtalı olması ziyanvericilərin azalmasına müsbət təsir edib”.
Fermer Əkbər Bəşirov: “5 hektardan artıq taxıl əkmişəm, 3 hektardan çoxu buğda sortudur. Yüksək məhsul almaq üçün keyfiyyətli şum, malalama işləri gedir. Hazırda əkilən taxıl kollanma fazasındadı və nəticəsi də göz qabağındadır. Yanvarın axırı biz suvarma işləri aparacağıq. Bu da siçanabənzər gəmiricilərin qarşısını alır”.
Qeyd edək ki, 2019-cu ildə rayonda zərərvericilərə qarşı aparılmış kompleks müşahidə və kimyəvi mübarizə tədbirlərindən sonra payızlıq taxıl sahələrində bu günədək siçanabənzər gəmiricilər demək olar ki, yox dərəcəsindədir. Hazırda mərkəzin mütəxəssisləri taxıl sahələri ilə yanaşı, yonca sahələrində də müşahidə tədbirlərini həyata keçirirlər. Həmin sahələrdə də zərərverici xəstəliklər müşahidə olunarsa, mübarizə tədbirləri aparılacaq.
Bölmənin digər xəbərləri
