Bakı, 6 sentyabr, AZƏRTAC

İsrail-Azərbaycan əməkdaşlığının zəifləməsi üçün ABŞ-dakı erməni diaspora təşkilatları fəaliyyətə keçib. Son üç ayda həm İsraildəki, həm də ABŞ-dakı müxtəlif fəallar Yaxın Şərq və okeanın o tayındakı informasiya resurslarında İsraili Azərbaycana dəstəyi dayandırmağa çağırırlar. Əsas tezis kimi onlar Holokost soyqırımından sağ çıxan yəhudilərin indi guya Qarabağda ermənilərin “soyqırımına şərik” olmaları tezisini irəli sürüblər. Avqustun birinci ongünlüyündə isə İsraildəki bir qrup yəhudi ziyalısı və alimləri Prezident İsxak Hersoqa müraciət edərək Qarabağ bölgəsində cərəyan edən qondarma humanitar böhranın həllinə köməklik göstərməyi xahiş ediblər. Müraciətdə qeyd edilirdi: "İsrail Dövlətinin regiondakı vəziyyətə cavabdeh olan Azərbaycanla sıx əlaqələri mövcuddur və bu böhranın sona çatmasına kömək etmək imkanı var. İsrail müdaxilə etmək və dayanmamaq kimi mənəvi öhdəliyə malikdir”. Bu müraciəti imzalayan, erməni diasporundan maliyyə alan qondarma ziyalılar, yəhudi psixologiyasına təsir etmək üçün Holokosta məruz qalan xalqı "soyqırımı" görmüş xalqın "əzabı"na biganə yanaşmamağa çağırır.

Bu sözləri AZƏRTAC-a açıqlamasında Dövlət İdarəçilik Akademiyasının müşaviri, politoloq Zaur Məmmədov söyləyib.

“Görünən odur kı, düşmən yatmır və bütün imkanlarından istifadə edərək İsrailin Azərbaycana dəstək verməməsi üçün əlindən gələni edir. Lakin İrəvan və erməni diaspor təşkilatlarının öz məqsədlərinə çatmayacağı dəqiqdir. Azərbaycan-İsrail müttəfiqliyi situativ deyil, dərin fəlsəfəyə və milli identikliyə bağlanır. Azərbaycanda yəhudi məskənləri var. Tarixən ölkəmizdə yəhudilərlə azərbaycanlılar mehriban şəraitdə yaşayıblar və Qafqazdakı bu yerli icmanın varlığının davam etdirilməsi hər iki ölkəyə lazımdır. Digər tərəfdən beynəlxalq münasibətlər sistemində geosiyasi amillər olduqca önəmlidir və tərəfləri bir-birinə bağlayan həm də təhlükəsizlik, inkişaf və bu kimi mövzularda üst-üstə düşən reallıqlardır.

ABŞ-dakı yəhudi diasporası ilə Azərbaycanın arasını soyutmaq ermənilər üçün əsas hədəflərdən biri olsa da bu istiqamətdə onlar heç nəyə nail olmayacaqlar. Amerika Yəhudi Təşkilatının, “Bnai Brith International” Təşkilatının, Ümumdünya Yəhudi Konqresinin (WJC) Avrasiya yəhudilərini dəstəkləyən Milli Koalisiyanın, Şimali Amerika Yəhudi Federasiyalarının, Amerika Yəhudi Təşkilatlarının prezidentləri mütəmadi olaraq Azərbaycan hakimiyyəti ilə Nyu-Yorkda, Bakıda görüşlər keçirir. Ümumdünya Yəhudi Konqresinin prezidenti, Avrasiya Yəhudi Konqresinin və Rusiya Konqresinin (RJC) nümayəndə heyəti ilə də Bakıda müxtəlif zamanlarda görüşlər keçirilib. Tərəfləri müəyyən strateji hədəflər bağlayır”, - deyə politoloq qeyd edib.

O bildirib ki, İsraillə Azərbaycan arasında hərbi-texniki əməkdaşlıq və təhlükəsizlik istiqamətində naliyyətlərə mane olmaq üçün bir qrup ekspert tərəfindən bölgə üçün alternativ güc balansı Paris-Tehran-İrəvan birliyi təklif olunur. Misal üçün, bu yaxınlarda "Hamoda" portalı bu prosesin artıq başlanmasını qeyd edir və bildirir ki, Qafqazda Azərbaycan və İsrailə qarşı birləşən Fransa, İran və Ermənistan arasında ünsiyyət sıxlaşıb.

Lakin o da məlumdur kı, Azərbaycanın İsrail ilə müttəfiqliyi İrana qarşı istiqamətlənməyib. Azərbaycan-İsrail, Azərbaycan-Türkiyə hərbi-siyasi əməkdaşlığı bölgədə separatizmin və işğalçılığın dəf edilməsinə yönəlib.

“Son aylarda erməni diasporunun yəhudi-Azərbaycan əməkdaşlığına qarşı ciddi sistemli iş aparmasına baxmayaraq, onlar öz məqsədlərinə çatmayacaqlar. Yaxşı olar ki, ümumdünya erməni diasporu, erməni kilsəsi, Ermənistan dövləti hünərlərini döyüş meydanında göstərsinlər. Əgər bunu bacarmırlarsa, sülh müqaviləsini bağlayaraq bölgədə sabitliyin bərqərar olmasında iştirak etsinlər”, - deyə Zaur Məmmədov vurğulayıb.