Ermənistan Azərbaycanın erməni sakinlərinin reinteqrasiyasına mane olmağa cəhd edir - ŞƏRH
Bakı, 31 iyul, AZƏRTAC
Azərbaycan Cinayət Məcəlləsinin 103 və 107-ci maddələri üzrə cinayətləri törətməkdə təqsirləndirilən, 10 ildir ki, beynəlxalq axtarış elan edilməklə məhkəmənin qərarı ilə barəsində həbs qətimkan tədbiri seçilmiş hərbi cani Vaqif Xaçaturyanın yaxalanmasından dərhal sonra Ermənistan Xarici İşlər Nazirliyinin qeyri-adekvat bəyanatları əslində azərbaycanlılara qarşı 30 il davam edən müharibə cinayətlərinin dövlət səviyyəsində törədildiyini və İrəvanın bu gün də öz çirkin əməllərinə haqq qazandırmaqda davam etdiyini göstərir.
Bu sözləri AZƏRTAC-a açıqlamasında Milli Məclisin deputatı Bəhruz Məhərrəmov söyləyib.
Onun sözlərinə görə, 25 nəfərin öldürülməsi, 14 şəxsə müxtəlif dərəcəli bədən xəsarətləri yetirilməsi, 358 nəfər azərbaycanlının isə hüquqi əsaslar olmadan qanuni yaşadıqları yerlərdən didərgin salınması faktlarını görməzdən gələn Ermənistanın müharibə canisini “insan haqları” pərdəsi altında müdafiə etməsi absurddur. Ermənistan insan hüquqları dedikdə yalnız ermənilərin hüquqlarından bəhs etməklə əslində bölgədə gərginliyin haradan qaynaqlandığını etiraf etmiş olur. Hərbi-siyasi cəhətdən dalana dirənmiş, siyasi manipulyasiyalarla və havadarlarının dəstəyi ilə heç nəyə nail ola bilməyən Ermənistan özü əslində adekvat davranaraq sülh və insanlıq əleyhinə, o cümlədən müharibə cinayətləri törətmiş şəxsləri cəzalandırmaqla özünün xoş niyyətini və bölgədə davamlı sülhdə maraqlı olduğunu göstərməli idi. Lakin görünən odur ki, Ermənistan hələ də revanşist niyyətindən əl çəkməyib və hər bir xüsusi hala Azərbaycan əleyhinə istifadə edə biləcəyi imkan kimi yanaşır. Bu yanaşma ilə bölgədə sülhü və sabitliyi təmin etmək asan deyil.
“Azərbaycan Vaqif Xaçaturyanı erməni olduğu üçün yox, məhz təkzibedilməz dəlillərlə təsdiqlənən müharibə cinayətlərinə görə yaxalayıb. Azərbaycan dövləti üçün cinayət törətmiş şəxslər qanun qarşısında bərabərdirlər və cinayət təqibi insanların irqindən, milliyyətindən, dinindən, dilindən asılı olmayaraq hər kəsin qanun və məhkəmə qarşısında hüquq bərabərliyi əsasında həyata keçirilir. Xarici İşlər Nazirliyinin bəyanatında da ifadə olunduğu kimi, “BQXK tərəfindən də təsdiq edildiyi kimi, ötən ilin dekabr ayından etibarən BQXK vasitəçiliyi ilə 700-ə yaxın erməni əsilli şəxsin tibbi məqsədlə Azərbaycan ərazisindən Ermənistana aparılmasına və geri gətirilməsinə şərait yaradılıb və onlara qarşı heç bir qanunsuz hərəkət tətbiq edilməyib”. Bu mənada Ermənistan Xarici İşlər Nazirliyi siyasi manipulyasiyalara əl ataraq Bakının erməni əsilli sakinləri hədəfə alması fonu yaratmaqla erməni sakinlər arasında təşviş yaradaraq onların Azərbaycan cəmiyyətinə reinteqrasiyasına mane olmağa cəhd edir”, - deyə deputat bildirib.
O diqqətə çatdırıb ki, Ermənistan Xarici İşlər Nazirliyi müharibə canisini həbs edərkən Azərbaycanın beynəlxalq humanitar hüququ pozması barədə bəyanatı ilə dünya diplomatiya tarixində analoqu olmayan savadsızlıq nümunəsi ortaya qoymuş oldu. Orta savadlı tələbə belə yaxşı anlayır ki, beynəlxalq humanitar hüququn təməlində dayanan Cenevrə və Haaqa hüquqları, konkret desək, 1949-cu il Cenevrə Konvensiyası, onun 1977-ci il Protokolu və 2005-ci il Əlavə Protokolları hərbi canilərin məsuliyyətə cəlb edilməsi ilə bağlı məhdudiyyət müəyyən etməyib. Humanitar hüququn vəzifəsi müharibənin aparılması qayda və üsullarına nəzarət etmək, silahlı qüvvələrdə yaralıların və xəstələrin vəziyyətinin yaxşılaşdırılması, hərbi əsirlərlə rəftar və müharibə zamanı mülki şəxslərin müdafiəsini təmin etməkdir. Əgər Ermənistan xarici işlər naziri beynəlxalq axtarışda olan şəxsin yaxalanmasını humanitar hüquqla əlaqələndirirsə, ilk növbədə, bu savad və təfəkkür tərzinə malik “diplomatlarla" sülh danışıqlarında Azərbaycan diplomatlarına sadəcə səbir və təmkin arzulaya bilərik. İkincisi isə, Cənubi Qafqaz tarixində ən böyük humanitar cinayətləri törətmiş Ermənistanın bu gün, ümumiyyətlə, humanitar niyyətlərdən danışması həm absurd, həm də yolverilməzdir.
O ki qaldı Xaçaturyanın özünün vəziyyətinə, onun Bakı şəhərində tibb müəssisəsinə yerləşdirilməsi, ona zəruri tibbi yardımın göstərilməsi təmin edilib, ona cinayət prosesi gedişində özünün hüquq və azadlıqlarını qanunla qadağan edilməyən üsul və vasitələrlə müdafiə etməsi üçün bütün şərait yaradılıb.
“Ermənistan yaxşı olar ki, Laçın dövlət sərhədindən keçid məntəqəsində sərhədçilərimizi atəşə tutmasını, qaçaqmalçılığa cəhd edilməsi və icazəsiz yük avtomobillərinin Azərbaycana göndərilməsi kimi təxribatların ardınca hərbi caninin saxlanması ətrafında şou yaratmaqla yeni manipulyasiyalara əl atmaqdan çəkinsin. Çünki Azərbaycan istər Ermənistanda, istərsə də Rusiya sülhməramlılarının müvəqqəti nəzarət zonasındakı bütün hərbi canilərin yaxalanması və ədalət mühakiməsinə təhvil verilməsi prosesini bundan sonra da qətiyyətlə davam etdirəcək. Xaçaturyanın yaxalanması ilə Azərbaycan dövləti göstərdi ki, heç nə unudulmur və müharibə cinayətlərinə hüquqi qiymətin verilməsi, o cümlədən 30 illik bir dövrdə sülh və insanlıq əleyhinə cinayətlər törətmiş hər bir cinayətkarın ifşa olunaraq məsuliyyətə cəlb edilməsində nə qədər qətiyyətlidir. Əgər İrəvan, yaxud havadarları zamanın keçməsi ilə Ermənistanın dövlət səviyyəsində törətdiyi cinayətlərin unudulacağını, yaxud hərbi canilərin məsuliyyətdən kənar qalacağını zənn edirsə, yanılır. Azərbaycan Cinayət Qanunvericiliyi ilə sülh və insanlıq əleyhinə cinayətlər, müharibə cinayətləri, terrorçuluq və terrorçuluğu maliyyələşdirmə əməllərinə görə müddətin keçməsi tətbiq olunmur. Bu mənada azərbaycanlılara qarşı soyqırımı cinayətləri törətmiş, o cümlədən digər müharibə cinayətləri törətmiş, sülh və insanlıq əleyhinə cinayətlər törətmiş müharibə canilərinin nə zaman yaxalanmasından asılı olmayaraq onlar mütləq qaydada cinayət məsuliyyətinə cəlb ediləcək”, - deyə Bəhruz Məhərrəmov vurğulayıb.
Bölmənin digər xəbərləri
