Ermənistan beynəlxalq hüquq normalarına məhəl qoymur
Bakı, 2 oktyabr, AZƏRTAC
Son otuz il ərzində Ermənistan sistemli şəkildə həyata keçirdiyi siyasət nəticəsində monoetnik dövlətə çevrilib. Əhalisinin tərkibində milli azlıqların etnik icmaları bir faizdən çox deyil. Rəsmi orqanlar tərəfindən bu siyasətin həyata keçirilməsi Avropa Şurasının 1995-ci il 1 fevral tarixli “Milli azlıqların hüquqlarının müdafiəsi haqqında Çərçivə Konvensiyasına” tamamilə ziddir.
Bu fikri AZƏRTAC-a açıqlamasında Azərbaycan Texniki Universitetinin professoru Əyyub Kərimov söyləyib.
Professor xatırladıb ki, Çərçivə Konvensiyası Ermənistan ərazisində 1998-ci il noyabrın 1-dən qüvvəyə minib. Ancaq Ermənistan hökumətinin yürütdüyü siyasət bu sənədin ayrı-seçkiliyin, assimilyasiyanın qadağan edilməsi, ictimai yerlərdə və şəxsi tədbirlərdə azlıqların öz dillərindən istifadəsi, əhalinin sosial strukturunun dəyişdirilməsinə yönəlmiş fəaliyyətdən imtina, transsərhəd əlaqə və əməkdaşlıq kimi müddəalarına ziddir.
“Müasir Ermənistanın tam monomilli olması faktı Ermənistan Xarici İşlər nazirinin müavini Aşot Havakimyan tərəfindən 2017-ci ilin aprel ayında BMT Baş Assambleyasının Üçüncü Komitəsində dinləmələr zamanı İrqi ayrı-seçkiliyin bütün formalarının ləğvi haqqında beynəlxalq konvensiyaya əsasən beynəlxalq öhdəliklərin icrası barədə hesabat müzakirə olunarkən təsdiq edilib. O, SSRİ-nin dağılması ərəfəsində yarım milyondan çox azərbaycanlının yaşadığı bir ölkədə indi bir nəfər azərbaycanlının olmaması faktını dana bilməyib.
Ermənistanda 2000-ci ildən 2018-ci ilə qədər ölkəni idarə edən Respublika partiyası 2004-cü ildə erməni faşist, Böyük Vətən müharibəsi canisi Qaregin Njdenin “tsexakron” nəzəriyyəsini partiyanın nəzəriyyəsi, 2016-cı ildə isə onu Ermənistanın rəsmi dövlət ideologiyası elan edib.
Əslində Ermənistandan yerli azərbaycanlıların köçürülməsi və Qarabağ müharibəsinin başlanmasının kökü də “tsexakron” ideologiyasının hədəflərindən biri idi.
Ermənistan işğal etdiyi ərazilərin bütün toponimlər və hidronimlərinə erməni dilində yeni adlar verib. Üstəlik bu adlar indiyə qədər tarixən mövcud olan ənənəvi adların erməni dilinə tərcüməsi nəticəsində deyil, UNESCO-nun prinsiplərinə tam zidd olaraq ərazinin ermənilərdən əvvəlki tarixi ilə heç bir əlaqəsi olmayan, yeni toponim və hidronim yaratmaqla dəyişiblər.
Bu ölkə heç bir beynəlxalq sənədə, o cümlədən faşizm caniləri haqqında Nürnberq məhkəməsinin qərarına baxmayaraq faşizm əlaltısı, canisi, əli minlərlə sovet döyüşçüsünün qanına batmış Njdeni qəhrəmanlaşdırır, 2003-cü ildə Qafanda, 2016-cı ildə isə İrəvanın mərkəzi meydanında - Ermənistan Hökumət Evinin binası qarşısında Njdeyə abidə ucaldılıb. Bu, Böyük Vətən müharibəsi illərində dünyanı faşizmdən azad etmək üçün həyatlarını qurban vermiş insanların xatirəsinə təhqir deyilmi?
BMT-nin tamhüquqlu üzvü olan suveren Azərbaycan Respublikasının ərazisinin 20 faizini işğal etmiş, bir milyondan çox insanı öz tarixi yurdlarından didərgin salmış Ermənistanın əməllərini 30 ildən artıq bir dövr ərzində beynəlxalq ictimaiyyət görmürmü?
Fikrimizcə, Ermənistanın əməllərinə beynəlxalq hüquq və BMT-nin qəbul etdiyi aşağıdakı qətnamə və bəyannamələr əsasında qiymət verilməlidir:
-BMT Təhlükəsizlik Şurasının Dağlıq Qarabağ münaqişəsi ilə bağlı 822, 853, 874 və 884 saylı qətnamələrinin tələblərinin yerinə yetirilməsi;
- Ümumdünya İnsan hüquqları Bəyannaməsi;
-Cenevrə Konvensiyasının protokolları;
-İrqi ayrı-seçkiliyin bütün formalarının ləğv edilməsi haqqında bəyannamə
-“İrqçiliyin müasir formalarının, irqi ayrı-seçkiliyin, ksenofobiya və onunla bağlı digər dözümsüzlük hallarının baş verməsinə şərait yaradan nasizmin və neonasizmin qəhrəmanlaşdırılması praktikasına qarşı mübarizə” haqqında bəyannamə;
- “Nasizmin qəhrəmanlaşdırılması: irqçiliyin müasir formalarının, irqi ayrı-seçkiliyin, ksenofobiya və onunla bağlı digər dözümsüzlük hallarının baş verməsinə şərait yaradan praktika hallarının yolverilməzliyi haqqında” bəyannamə;
- “Avropadakı neonasist təcavüzkarlığın artması” haqqında bəyannamə.
Beynəlxalq hüquq normalarına məhəl qoymayaraq ərazimizin 20 faizini işğal altında saxlamaqda davam edən Ermənistanın təxribatlarına cavab olaraq Ali Baş Komandanımızın əmri ilə ordumuz əks-hücuma keçməklə torpaqlarımızın azad edilməsi uğrunda Vətən müharibəsinə başlayıb.
Otuz ildir torpaqlarımızda möhkəmlənməyə, ona sahiblənməyə çalışan, ərazimizdə ikinci erməni dövləti yaratmağa cəhd edən bədnam qonşularımız ordumuzun müzəffər hücumu, xalqımızın qalibiyyət ruhu qarşısında acizliyini dərk etmək məcburiyyətində qaldı.
Bu gün şanlı ordumuz Azərbaycan tarixinin yeni mərhələsinin salnaməsini yazmaqdadır. Məğlubiyyətini pərdələməyə çalışan Ermənistan iftiraya əsaslanan təbliğat və qarayaxma kompaniyasını davam etdirir. Lakin tarix Azərbaycan xalqına beynəlxalq aləmdə baş verən mürəkkəb, ikili standartlı, ziddiyyətlərlə dolu prosesləri düzgün qiymətləndirən, geosiyasi dəyişikliklərin gedişini xalqımızın maraqları çərçivəsinə yönəltməyə qadir olan, bu məqsədlə praqmatik, rasional gedişlər etməyi bacaran, hadisələrin inkişaf axarını qabaqlaya bilən lider bəxş edib.
Fikrimi Ali Baş Komandanımızın Vətən uğrunda gedən döyüşlərdə yaralanan hərbiçilərlə görüşü zamanı dediyi sözlərlə tamamlamaq istərdim: “Bizim davamız haqq davasıdır. Biz tarixi nöqteyi-nəzərdən, beynəlxalq hüquq nöqteyi-nəzərdən, ədalət nöqteyi-nəzərdən haqlıyıq. Azərbaycan əsgəri, zabiti öz doğma torpağı uğrunda vuruşur.
Biz zəfər çalacağıq, Qarabağ bizimdir, Qarabağ Azərbaycandır!”
Bölmənin digər xəbərləri
