ERMƏNİSTAN BEYNƏLXALQ TƏŞKİLATLARIN QƏRARLARINA MƏHƏL QOYMUR
AZƏRTAC-ın verdiyi xəbərə görə, Prezident İlham Əliyev bu fikri Heydər Əliyev adına Azərbaycan Ali Hərbi Məktəbin növbəti buraxılışına həsr olunmuş mərasimdə söyləmişdir.
Beynəlxalq hüququn bütün ölkələrə şamil edildiyini vurğulayan Prezident demişdir ki, dövlətlərin hamısı Birləşmiş Millətlər Təşkilatının üzvləridir və BMT dünyanın bir nömrəli təşkilatıdır. Bu təşkilatın Ermənistan-Azərbaycan münaqişəsinə dair 4 qətnaməsi vardır. Orada açıq-aşkar deyilir ki, işğalçı silahlı qüvvələr zəbt olunmuş torpaqlardan qeyd-şərtsiz çıxmalıdır. Avropa Şurasının qəbul etdiyi qətnamədə Ermənistan təcavüzkar dövlət kimi tanınır. GUAM təşkilatı dondurulmuş münaqişələrə dair bəyanat qəbul etmişdir. İqtisadi Əməkdaşlıq Təşkilatının da müvafiq qətnaməsi vardır. Ancaq Ermənistan heç bir beynəlxalq təşkilatın qərarına məhəl qoymur. Belə olan halda, biz bütövlükdə beynəlxalq tənzimləmə mexanizmlərinə artıq ümidsizliklə yanaşırıq. Ancaq biz torpaqlarımızın itirilməsi ilə heç vaxt barışa bilmərik. Dağlıq Qarabağın Azərbaycandan ayrılmasına heç vaxt icazə vermərik və bu, danışıqlar mövzusu deyildir.
Bölmənin digər xəbərləri
