Ermənistanda hərbi xidmətdən tərxis olunan əsgər avtomobil qəzasında ölüb

Tbilisi, 11 iyul, AZƏRTAC

İyulun 11-də İrəvan-Meğri yolunun 175-ci kilometrliyində, Qorayk kəndi yaxınlığında “Mitsubishi Grandis” markalı mülki avtomobil qəzaya uğrayıb.

AZƏRTAC xəbər verir ki, hadisə nəticəsində 2 nəfər yerindəcə ölüb, beş nəfər müxtəlif dərəcəli bədən xəsarətləri ilə tibb müəssisələrinə aparılıb.

Bu barədə Ermənistan istintaq komitəsi sədrinin müavini Qor Abramyan öz “Facebook” səhifəsində yazıb.

İlkin məlumata görə, tərxis olunan əsgərlər taksi ilə İrəvana gedirmiş.

Ölənlərdən biri sürücü, ikisi isə sərnişindir.

İki nəfərin vəziyyəti ağır, digər iki nəfərin vəziyyəti orta ağır, birinin vəziyyəti isə qənaətbəxş qiymətləndirilir.

Faktla bağlı Cinayət Məcəlləsinin 342-ci K maddəsinin 3-cü hissəsi ilə cinayət işi başlanıb, zəruri istintaq-əməliyyat tədbirləri davam etdirilir.

Xətayi Əzizov

AZƏRTAC -ın xüsusi müxbiri

Tbilisi

MÜƏLLİFLƏ ƏLAQƏ