Ermənistanın keçmişindən ciddi dərs çıxarması gələcək taleyi üçün daha yaxşı olar - Hərbi ekspert
Bakı, 6 avqust, AZƏRTAC
Azərbaycan Silahlı Qüvvələrinin İkinci Qarabağ müharibəsindəki Qələbəsi hərb tariximizə qızıl hərflərlə yazıldı. Uzun illər Ermənistan tərəfindən işğal altında saxlanılan torpaqlarımızı 44 gün ərzində düşməndən təmizləmək Azərbaycan Ordusunun döyüş hazırlığının, əzminin, şücaətinin və qəhrəmanlığının nümunəsi idi. Burada yüksək əhvali-ruhiyyə və döyüş hazırlığından əlavə, müasir silah-sursat və texnika ilə təchizat da qeyd olunmalıdır. Otuz il ərzində Ordumuzun hərbi potensialının ilbəil artırılması döyüş meydanında qısa müddətdə Qələbənin qazanılmasında töhfəsini verdi. Silahlı Qüvvələrimiz Vətən müharibəsində ənənəvi taktikanın əvəzinə, düşmənin uzun illərdir qurduğu istehkamların yarılması üçün ərazinin relyefinə uyğun olaraq tətbiq etdiyi üsul və manevrlər dünyanın aparıcı hərbi araşdırma mərkəzləri tərəfindən bu gün də öyrənilir.
Bu sözləri AZƏRTAC-a açıqlamasında hərbi ekspert Azər Bayramov söyləyib.
Ekspert bildirib ki, müharibənin başa çatmasına baxmayaraq, Azərbaycan Ordusu arsenalını müasir hərbi texnikalarla gücləndirməyə davam edir, bu istiqamətdə fəaliyyətlər həyata keçirir. Prezident, Müzəffər Ali Baş Komandan İlham Əliyevin tapşırığına uyğun olaraq yeni komando birliklərinin yaradılmasına başlanılması 44 günlük savaşdan sonrakı bir çox əməliyyatların uğurla yekunlaşmasına ciddi təsir göstərdi. Bu, dövlətimizin başçısının uzaqgörənliklə verdiyi qərarların strateji əhəmiyyətə malik olduğunu növbəti dəfə sübuta yetirdi.
“İkinci Qarabağ müharibəsindən sonra ərazilərimizdə qalmış separatçılar və qanunsuz silahlı birləşmələr mütəmadi olaraq terror-təxribat fəaliyyətlərini davam etdirirdilər. Bu səbəbdən də ermənilərin təxribatlarının qarşısının alınması məqsədilə təhdid törədən strateji mövqelərin təmizlənməsi əməliyyatları həyata keçirilirdi. Ordumuz ilk olaraq Fərrux dağını, sonra Kəlbəcər-Laçın istiqamətində bir çox yüksəklikləri nəzarət altına aldı. Həmçinin aparılan “Sarıbaba-Qırxqız”, “Qisas” əməliyyatları da düşmən təhdidlərini böyük ölçüdə zərərsizləşdirdi. Digər hərbi-strateji uğurlarımız kimi, Laçında sərhəd-buraxılış məntəqəsinin qurulması da 2023-cü il sentyabrın 19-20-də həyata keçirilən antiterror tədbirləri zamanı ölkəmizə ciddi üstünlüklər qazandırdı.
Yeni yaradılan hərbi birliklərin döyüş hazırlığının qısa zaman ərzində yüksəldilməsi bir sutkadan da az davam edən əməliyyatlarda Azərbaycan Ordusunun mütləq Qələbə qazanmasına imkan verdi. Vətən müharibəsindən sonra Ermənistanın Qarabağda qalan terrorçuları silahlandırması, onlara təlimlər keçməsi qanunsuz silahlı birləşmələrə heç bir kömək etmədi. Qanunsuz silahlı birləşmələrin ciddi silah-sursat təchizatına baxmayaraq, Azərbaycan Ordusu arsenalındakı yüksək dəqiqlikli silahlardan məharətlə istifadə etməklə, eyni zamanda, hərbi birliklərimiz yüksək peşəkarlıq və döyüş hazırlığı nümayiş etdirməklə düşməni pərən-pərən saldı. Döyüşün ilk saatlarında düşmənin əsas texnikaları sıradan çıxarıldıqdan sonra hərbçilərimiz unikal taktika və manevrlər nəticəsində terrorçuları təslim olmağa məcbur etdilər”, - deyə hərbi ekspert vurğulayıb.
A.Bayramov əlavə edib ki, Ermənistanın havadarları revanşistlərin ruhlandırılması, bu ölkəyə hücum silahlarının verilməsi ilə hansısa müsbət nəticəyə nail ola bilməyəcəklərini anlamalıdırlar. Bu günə qədər Ermənistana göstərilən hərbi və maddi yardımların ona kömək etmədiyini 4 ilə yaxın müddətdə bütün dünya gördü. Ona görə də Ermənistanın keçmişindən ciddi dərs çıxarması gələcək taleyi üçün daha yaxşı olar.
Bölmənin digər xəbərləri
