İDMAN
Estoniyalı futbolçuların məğlubiyyət şərhi: Azərbaycan millisi yaxşı komandadır, səhvi bağışlamır
Bakı, 14 oktyabr, AZƏRTAC
“Əgər rəqibi cərimə meydançamızda nəzarətsiz qoyub 9-cu dəqiqədə məğlub duruma düşürüksə, bu, təbii ki, normal hal deyil”.
AZƏRTAC xəbər verir ki, bu sözləri Estoniya yığmasının futbolçusu Mattias Kyayt AVRO-2024-ün seçmə mərhələsində evdə Azərbaycan millisinə 0:2 hesabı ilə uduzduqları oyun barədə yerli mətbuata açıqlamasında deyib.
25 yaşlı yarımmüdafiəçi ilk hissədə yol verdikləri səhvləri ikinci yarıda da təkrarladıqlarını bildirib: “Özümüzü çətin vəziyyətə saldıq və axmaq səhvlər etdik. Nəticədə rəqiblə fərqlənmək üçün fürsət verdik. Azərbaycan yaxşı komandadır. Onlara imkan versəniz, sizi cəzalandıracaqlar”.
O, evdə keçirdikləri oyunların ikinci hissəsində yaxşı çıxış etmədiklərini söyləyib: “Amma Azərbaycanla matçda nə qədər enerjili olduğumuzu və topla oynamaq bacarığımızı göstərdik. Bunu ilk yarıda niyə etmədiyimizi bilmirəm”.
Rumıniyanın “Rapid” komandasında çıxış edən futbolçunun fikrincə, estoniyalı azarkeşlərin komandanı fitə basması normaldır: “Onlar tamamilə haqlıdırlar. Belə oynadığımız zaman stadionun tam dolacağını və azarkeşlərin bizi alqışlayacağını gözləyə bilmərik. Yenidən toparlanıb nəyi yaxşılaşdıracağımızı düşünməliyik. Hər oyundan sonra eyni şeyi deyirəm, amma yenə də heç nə olmur. Bu, sadəcə, ayıbdır”.
Estoniya yığmasının mərkəz müdafiəçisi Maksim Paskotşi də Azərbaycanla görüşdə zəif oynadıqlarını etiraf edib: "Birinci hissədə vurulan qollar yenə ölümcül oldu, onları özümüz hədiyyə etdik. Nə hücumda, nə də müdafiədə uğur qazana bildik. İkinci hissəni daha yaxşı keçirdiyimizi düşünürəm. Çünki topla daha çox oynadıq. Start fitindən etibarən belə oynasaydıq, nəticə başqa cür olardı”.
Yarımmüdafiəçi Martin Vetkal isə topla çox az oynadıqlarını söyləyib: “Rəqib ilk hissədə bizə oynamaq şansı verdi. Amma nədənsə daha uzun ötürmələrdən istifadə etdik. İlk yarıda Azərbaycan millisinin iki şansı oldu və hər ikisindən maksimum yararlandı. İkinci hissədə isə biz daha çox hücum etdik. Qol şansları da yaxaladıq, lakin top qapıya daxil olmadı”.