Eyyub Kərimli: Azərbaycandan Avropaya yaşıl enerji ixracı ilə bağlı vacib layihələr reallaşdırılacaq
Bakı, 12 yanvar, AZƏRTAC
Azərbaycan Respublikasının Prezidenti müsahibəsi zamanı həm daxili, həm xarici auditoriya üçün mühüm və strateji mesajlar verdi. Əvvəlcə cari ildə sosial xərclərin prioritet istiqamət olacağı vurğulanıb. Belə ki, minimum əməkhaqqının və minimum pensiyanın artırılması, şəhid ailələrinə mənzil təminatının həyata keçirilməsi davam edəcəkdir. Bununla yanaşı, orta əməkhaqqı məbləğinin 900 manata çatdırılması üçün iqtisadi siyasət davam etdiriləcək. Əlbəttə ki, bu, öz növbəsində həm ümumi əhalinin rifahının yüksəldilməsi, həm də əhalinin sosial həssas təbəqəsinin gəlirlərinin artırılmasına müsbət təsir göstərəcək. Önəmli digər mesajlardan biri də ölkənin xarici ticari əlaqələrinin perspektivləri, ölkəmizin Avropanın enerji təhlükəsizliyində artan rolu və mövqeyi, həmçinin ölkənin nəqliyyat və logistika imkanlarının artırılması barədə idi. İonika-Adriatik dənizi layihəsi və Albaniyada qaz şəbəkəsinin yaradılması haqqında verilən məlumat Azərbaycanın Avropada mövqeyini möhkəmləndirərək, Balkanlarda ölkəmizi gücləndirəcək layihələrin anonsu idi.
Bu fikirləri AZƏRTAC-a açıqlamasında İqtisadi və Sosial Araşdırmalara Yardım İctimai Birliyinin sədri Eyyub Kərimli deyib.
O qeyd edib ki, Rusiyanın silah bazarından çıxması və Azərbaycanın bu bazarda mövqeyinin genişlənməsinə dair açıqlama, əslində ölkənin silah sənayesinin perspektiv hədəflərindən xəbər verir. Bu da ölkəmiz üçün yeni bir sahədə dünya bazarına çıxış və qeyri-neft sektorunun inkişafı üçün unikal şansdır. Bu sahədən ölkəyə 100 milyon dollar gəlir gəlməsi nəzərdə tutulub. Həmçinin Transxəzər layihəsi ilə bağlı birmənalı mesajlar verilib. Azərbaycan yalnız digər iştirakçıların müraciətinə müsbət cavab verə bilər.
“Respublikanın dəmir yolunun və limanlarının inkişafı, Şərq-Qərb və Şimal-Cənub nəqliyyat xətti üzrə artan yükdaşıma həcminə tam hazırlıq dövlətimizin başçısının Azərbaycanın coğrafi mövqeyini daha səmərəli beynəlxalq nəqliyyat habına transformasiya edilməsi siyasətinin bariz nümunəsidir. Bu baxımdan Zəngəzur dəhlizinin reallaşmasının iqtisadi və siyasi dividentləri Azərbaycan Prezidenti tərəfindən bölgə ölkələri üçün iqtisadi cəhətdən əsaslandırıldı. İqtisadi inkişafı şərtləndirən digər yeni sahə də növbəti illərdən Avropaya yaşıl enerji ixracıdır ki, respublikada bununla bağlı əhəmiyyətli və vacib layihələr həyata keçiriləcək. Sevindirici haldır ki, bu sahəyə xarici investisiyanın cəlb olunması iqtisadiyyat üçün yeni perspektivlər vəd edir”, - deyə Eyyub Kərimli vurğulayıb.
Onun sözlərinə görə, ümumiyyətlə, Prezident İlham Əliyevin müsahibəsinə diqqət etsək, bu il ölkənin iqtisadi inkişafı baxımından çox zəngin və çoxşaxəli transkontinental layihələrin həyata keçirildiyi, respublikanın iqtisadi mövqeyinin gücləndirildiyi və ölkə iqtisadiyyatının yeni səviyyəyə yüksəldiyi haqda müsbət nəticəyə gələ bilərik.
Bölmənin digər xəbərləri
