Əziz Ələkbərli: Qərbi Azərbaycana dönüş beynəlxalq hüququn normalarına əsaslanır VİDEO
Bakı, 26 fevral, AZƏRTAC
Azərbaycan xalqının tarixi ədaləti bərpa etməsinin və ata-baba torpaqlarına qayıdış prosesinin qarşısı heç bir qüvvə tərəfindən alına bilməz. Qırx dörd günlük Vətən müharibəsi və antiterror əməliyyatları nəticəsində Azərbaycan xalqı Xocalının qisasını aldı və keçmiş məcburi köçkünlər öz yurdlarına qayıtmağa nail oldular. Bununla da ermənilərin 200 ildən çox davam edən işğal strategiyası darmadağın edildi. Qərbi Azərbaycan da daxil olmaqla, tarixi torpaqlara dönüş Azərbaycan xalqının təməl hüququdur və bu, beynəlxalq hüquq normalarına əsaslanır. Necə ki, Qarabağa və Şərqi Zəngəzura qayıtdıq, eyni qaydada Qərbi Azərbaycana da qayıdacağıq. Bunu ermənilər istəsə də, istəməsə də, baş verəcək. Çünki bu, bizim tarixi haqqımızdır.
AZƏRTAC xəbər verir ki, bu sözləri “Ana harayı” abidəsini ziyarət edən Qərbi Azərbaycan İcmasının sədri Əziz Ələkbərli jurnalistlərə açıqlamasında söyləyib.
O, həmçinin vurğulayıb ki, son iki ildə Qərbi Azərbaycan həqiqətləri beynəlxalq səviyyədə daha geniş yayılmağa başlayıb: “Artıq BMT-nin rəsmi sənədləri arasında Qərbi Azərbaycan İcmasının doqquz sənədi yer alır. Lakin bu, yetərli deyil və beynəlxalq təşkilatlar bu məsələyə ikili standartlarla deyil, ədalətli yanaşmalıdırlar”.
Əziz Ələkbərli bir daha vurğulayıb ki, Qərbi Azərbaycan icması öz yurdlarına qayıtmaq üçün mübarizəsini sona qədər davam etdirəcək.
Bölmənin digər xəbərləri
