FHN daha bir tibb müəssisəsində rentgen-müayinə fəaliyyətini dayandırıb
Bakı, 9 oktyabr, AZƏRTAC
Fövqəladə Hallar Nazirliyi (FHN) daha bir tibb müəssisəsində rentgen-müayinə fəaliyyətini dayandırıb.
Bu barədə AZƏRTAC-a FHN-in mətbuat xidmətindən məlumat verilib.
Məlumata görə, FHN-in Nüvə və Radioloji Fəaliyyətin Tənzimlənməsi üzrə Dövlət Agentliyi səlahiyyətlərinə uyğun olaraq ölkə ərazisində nüvə və radioloji fəaliyyət sahəsində təhlükəsizliyin təmin olunması istiqamətində zəruri tədbirlərin görülməsini davam etdirir.
Agentlik tərəfindən paytaxtın Nərimanov rayonunda fəaliyyət göstərən “Nərimanov Tibb Mərkəzi” Publik Hüquqi Şəxsin 2 nömrəli poliklinika şöbəsindəki rentgen kabinetində keçirilmiş yoxlama tədbirləri zamanı radiasiya təhlükəsizliyi tələblərinin pozulmasına dair faktlar, o cümlədən ionlaşdırıcı şüa mənbələri hesab olunan qurğuların istismarı üçün tələb edilən müvafiq icazənin olmadığı aşkarlanıb.
Həmin pozuntularla əlaqədar Agentlik qanunvericiliyin tələblərinə uyğun olaraq görülmüş tədbirlər nəticəsində qeyd olunan tibb müəssisəsində rentgen kabinetinin fəaliyyətini dayandırıb.
Bölmənin digər xəbərləri
