Filip Ozobiç Azərbaycan çempionatlarında tarixi rekorda imza atıb
Bakı, 13 aprel, AZƏRTAC
Filip Ozobiç Azərbaycan çempionatları tarixinin rekorduna imza atıb.
AZƏRTAC xəbər verir ki, o, 1992-ci ildən keçirilən turnirin tarixində ən çox qol vuran legioner və ya çempionatda legioner kimi debüt edib sonradan Azərbaycan vətəndaşlığı alanlar arasında ən yaxşı bombardir olub.
Hazırda “Turan Tovuz”un formasını geyinən Xorvatiyaəsilli yarımmüdafiəçi bunu 72-ci qolunu vurmaqla gerçəkləşdirib. O, Azərbaycan Premyer Liqasının XXVII turunun “Sumqayıt”la ev görüşündə (2:1) fərqlənib.
72-ci qolunu 225-ci matçında vuran Ozobiç Azərbaycan millisinin formasını geyinmiş gürcüstanlı Badri Kvaratsxeliyanın rekordunu geridə qoyub. “Kəpəz” və “Şəmkir”də oynamış forvard 132 matçda 71 qola imza atıb.
Filip Ozobiç Premyer Liqada 4 klubda çıxış edib. İndiki komandasında 26 oyunda 6 qola sevinən futbolçu bunadək “Qəbələ” (46 oyunda 16 qol), “Qarabağ” (95 oyunda 35 qol) və “Neftçi”nin (58 oyunda 15 qol) uğurları üçün çalışıb.
Qeyd edək ki, Premyer Liqada 2016/2017-ci illər mövsümündə debüt edən yarımmüdafiəçi “Qəbələ”də vurduğu 11 qolla həmin çempionatın bombardiri adına şərik olub.
Bölmənin digər xəbərləri
