Bakı, 16 iyun, AZƏRTAC

İyunun 13-14-də Azərbaycan Banklar Assosiasiyası və Azərbaycan Respublikasının Mərkəzi Bankının təşkilatçılığı, İqtisadi İslahatların Təhlili və Kommunikasiya Mərkəzinin, Azərbaycan Fintex Assosiasiyasının dəstəyi və “Visa” şirkətinin qlobal tərəfdaşlığı ilə “Fintex sammit 2023” (maliyyə və texnologiyalar sərgisi) “Bank və Maliyyə Ekosistemində Yeni Trendlər: İnnovativ Həllər, Fintex və Təhlükəsizlik” adlı sammit öz işini yekunlaşdırıb.

AZƏRTAC xəbər verir ki, Ümummilli Lider Heydər Əliyevin anadan olmasının 100 illik yubileyinə həsr olunan və iki gün davam edən sammitdə aidiyyəti dövlət qurumları, banklar və ödəniş ekosistemində təmsil olunan təşkilatlarla yanaşı, beynəlxalq maliyyə institutlarının, yerli və xarici ictimai təşkilatların, habelə xarici dövlətlərin Azərbaycandakı səfirliklərinin nümayəndələri iştirak edib.

Həmçinin sammitdə Türkiyə, Amerika Birləşmiş Ştatları, Avropa Birliyi, Müstəqil Dövlətlər Birliyi, Yaxın Şərq və digər ölkələrdən 200-ə yaxın beynəlxalq təşkilatlar və nüfuzlu şirkətlərin nümayəndələri iştirak ediblər.

Sammit çərçivəsində, iyunun 13-də Azərbaycan, Qazaxıstan, Qırğızıstan, Özbəkistan, Türkiyə və qonaq qismində Macarıstan, Şimali Kipr Banklar Assosiasiyasının rəhbərləri və nümayəndələrinin iştirakı ilə “Türkdilli Dövlətlərin Banklar Assosiasiyaları Şurası”nın ikinci iclası keçirilib.

Bundan əlavə, sammit çərçivəsində Azərbaycan Banklar Assosiasiyası, Beynəlxalq Maliyyə Korporasiyası (IFC), Türkiyə İştirakçı Banklar Birliyi və Macarıstan Banklar Assosiasiyası arasında əməkdaşlığa dair sənədlər imzalanıb.

Ümumilikdə iki gün ərzində Sammitdə səkkiz paneldə, müxtəlif əlaqədar mövzularda müzakirələr aparılıb, 50-yə yaxın spiker təcrübələrini bölüşərək təqdimatlarını keçirib.

Sammitin təşkilatçısı olan ABA-nın prezidenti Zakir Nuriyev tədbir barədə öz fikirlərini bölüşərək bildirib: “Hər il tərəfimizdən təşkil edilən, həm “Fintex Sammit”, həm də Beynəlxalq Bankçılıq Forumu regionun ən nüfuzlu maliyyə-bank tədbirlərinə çevrilib. Bu iki gün ərzində davam edəcək “Fintex Sammit” rəqəmsal texnologiyaların səmərəli, təhlükəsiz və davamlı tətbiqi sahəsində beynəlxalq təcrübənin mənimsənilməsi, son trendlərin müzakirəsi, əldə olunan nailiyyətlərin açıqlanması və prioritet inkişaf istiqamətlərinin müəyyən edilməsi baxımından əlverişli bir platforma olacağına inanıram”.

Sammitin ənənəvi qlobal sponsoru olan “Visa” şirkətinin Azərbaycan, Mərkəzi Asiya, MDB və Cənubi-Şərqi Avropa üzrə regional meneceri, vitse-prezidenti Kristina Doroş ABA-nın keçirdiyi bu tədbir haqqında fikirlərini bölüşərək deyib: “Visa fəaliyyət göstərdiyi hər bir ölkədə sənayemizdə yeni texnologiyalar, çağırışlar, imkanlar və nağdsız iqtisadiyyatın inkişafı məsələlərini müzakirə etmək üçün ödəniş ekosisteminin bütün iştirakçılarını bir araya gətirməyə çalışır. Əminəm ki, Azərbaycanda bir neçə ildir ki, dəstəklədiyimiz “Fintex Sammit” bütün fintex oyunçuları üçün fikir mübadiləsi və ən yaxşı təcrübələrini bölüşmək üçün ideal platformadır. “Visa” bu tədbirin uzun müddətdir partnyoru olmaqdan və rəqəmsal ödənişlərin qlobal lideri kimi geniş təcrübələrini bölüşərək Azərbaycanı nağdsız ödənişə aparan yolda dəstəkləməkdən qürur duyur”.

“Visa”nın Azərbaycan üzrə regional meneceri, baş direktoru Nurlan Hacıyev bildirib ki, “Visa” olaraq, biz “Fintex Sammit” kimi tədbirləri dəstəkləməyə şadıq, çünki Azərbaycanda fintex sənayesinin innovativ potensialına inanırıq. Biz Azərbaycanın biznes mühiti və istehlakçıları arasında yeni ödəniş həllərinə artan tələbatı müşahidə edirik və müştərilərimizə qabaqcıl texnologiyalar təklif etməklə bu tələbi qarşılayırıq. Azərbaycan son illərdə rəqəmsal məkanda böyük irəliləyiş əldə edib və biz “Visa” olaraq bu nailiyyətə töhfə verməkdən məmnunuq.

Qeyd edək ki, iki günlük sammit Bakıda hər il təşkil edilən iki beynəlxalq tədbirdən biri olmaqla regionun ən nüfuzlu maliyyə-bank tədbiridir.