Formula 1 Azərbaycan Qran-Prisi: Luis Hamilton dünya çempionatında liderliyə yüksələ biləcəkmi?
Bakı, 27 aprel, AZƏRTAC
Aprelin 27-də Bakıda üçüncü dəfə Formula 1 Azərbaycan Qran-Prisinə start verilib.
AZƏRTAC xəbər verir ki, avtoidman həvəskarları hər birində iki pilotun mübarizə apardığı on komandanın Formula 1 üzrə dünya çempionatının qalibi olmaq uğrunda aparacağı gərgin idman mübarizəsinin şahidi olacaqlar.
Formula 1 birnəfərlik, açıq təkərli avtomobil yarışları üzrə dünya çempionatıdır. Bu yarışlar 1950-ci ildən etibarən müntəzəm olaraq keçirilir. Qeyri-rəsmi olaraq Formula 1 sürücüləri pilot, avtomobillər isə bolid adlandırılır. Formula 1 yarışları Beynəlxalq Avtomobil Federasiyasının müəyyən etdiyi qaydalara əsasən təşkil edilir. Yarışlar il ərzində müxtəlif ölkələrdə keçirilən mərhələlərdən ibarət olur. Hər mərhələyə Qran-Pri adı verilir. Çempionatda həm sürücülər, həm də komandalar yarışırlar. Pilotlar dünya çempionu titulu, komandalar isə Mühəndislər Kuboku uğrunda mübarizə aparırlar. İlin sonunda bütün Qran-Prilərdən toplanan xalların əsasında pilotlar və komandalar arasında qalib müəyyən edilir və mükafatlandırılır.
Formula 1 yarışları tamaşaçı auditoriyasına görə futbol üzrə dünya çempionatından və Olimpiya Oyunlarından sonra üçüncü sırada durur. Dünyada yarım milyarddan çox tamaşaçı auditoriyası olan Formula 1 çempionatlarından birincisi 1950-ci ildə keçirilib. İlk yarışda “Alfa Romeo” komandası və onun italiyalı pilotu Cüzeppe Farina çempion olub. Ən çox çempion adını “Ferrari” komandasının əfsanəvi alman pilotu Mixael Şumaxer qazanıb. O, 7 dəfə çempion olub. Ümumilikdə onun hesabında 91 qələbə var. O, ilk qələbəsini 1992-ci il Belçika Qran-Prisində, sonuncu uğurunu isə 2006-cı il Çin Qran-Prisində əldə edib. Formula 1 tarixinin ən gənc qalibi isə Maks Ferstappen olub. Belçikalı pilot 2016-cı ildə İspaniya Qran-Prisində 18 yaş 227 günlüyündə qələbə qazanıb. Ən yaşlı qalib pilot isə Luici Facioli olub. O, 1951-ci il Fransa Qran-Prisində 53 yaşında qalib gəlib.
Azərbaycan artıq üçüncü ildir Formula 1 yarışlarına ev sahibliyi edir. Formula 1 çempionatının Bakı mərhələsi avtoidman həvəskarları tərəfindən ən maraqlı Qran-Prilərdən biri kimi səciyyələndirilir. Almaniyalı Herman Tilke tərəfindən layihələndirilən 6 kilometr uzunluğundakı şəhər treki nadirliyi ilə seçilir. Bakıda keçirilən yarış zamanı avtomobillər dənizkənarı bulvar boyunca hərəkət edir, şəhərin ən qədim hissəsi olan və UNESCO-nun dünya irsi siyahısına daxil edilən İçərişəhər Tarix-Memarlıq Qoruğunun ətrafında dövr edirdilər. Beləliklə, yarışı izləyən televiziya tamaşaçıları və qonaqlar şəhərin tam simasını görmək imkanı qazanırlar.
Ölkəmizdə keçirilən və Avropa Qran-Prisi adlandırılan ilk yarışın qalibi “Mercedes”in pilotu Niko Rosberq olub. Həmin mövsüm N.Rosberq dünya çempionatının qalibi, “Mercedes” komandası isə Mühəndislər Kubokunun sahibi olub. N.Rosberq dünya çempionu olduqdan sonra karyerasını başa vurub.
Ötən ildən Azərbaycan Qran-Prisi adlandırılan yarışın qalibi adını “Red Bull Racing” komandasının avstraliyalı pilotu Daniel Rikkardo qazanıb. 2011-ci ildə Böyük Britaniya Qran-Prisində debüt edən Daniel Rikkardo 28 dəfə podyuma qalxıb. Bakının onun üçün uğurlu olduğunu bildirən Daniel Rikkardo deyib: “Ötən il Bakıda qələbə qazandım və həmin yarışla bağlı çox gözəl xatirələrim var. Bizə uğur qazandıran trekə yenidən qayıdırıq. Bakıya xoş hisslərlə gəlmişik. İki həftə əvvəl Çin Qran-Prisində rəqiblərimi qabaqladım. Yarışı birinci dövrədən sonra başa vurmaq çox çətindir. Üç həftə sonra Çində qalib gəlmək şansım var idi və bundan istifadə etdim. Orada da Bakıda olduğu kimi qalib gəldim”.
Bu il Azərbaycan Qran-Prisində mübarizə aparan pilotlar arasında ən titullusu “Mersedes”in britaniyalı pilotu Luis Hamiltondur. Dörd dəfə dünya çempionu olan L.Hamiltonun bu dəfə də şansları yüksək qiymətləndirilir. Formula 1 yarışında ilk dəfə 2007-ci ildə “McLaren” komandasının heyətində debüt edən britaniyalı pilot 2008-ci ildə birinci çempionluğunu yaşayıb. 2013-cü ildə “Mersedes” komandasında transfer edilən britaniyalı pilot üç dəfə - 2014-cü, 2015-ci və 2017-cı illərdə ən güclü olduğunu sübut edib.
Avtoidman həvəskarları cari Formula 1 çempionatının dördüncü Qran-Prisi olan Bakı yarışında elə ilk anlardan gərgin idman mübarizəsinin şahidi olublar. Luis Hamilton indiyədək başa çatan ilk üç Qran-Pridə qələbə qazana bilmədiyi üçün Bakı mərhələsinin gərgin idman mübarizəsi şəraitində keçəcəyi gözlənilir. Builki çempionatın ilk iki mərhələsində - Avstraliya və Bəhreyn Qran-prilərində Sebastian Fettel (“Ferrari”), Çin Qran-Prisində isə Daniel Rikkardo (“Red Bull Racing”) qalib gəliblər. Üç Qran-Prinin yekununa əsasən, hazırda çempionata 54 xalla S.Fettel liderlik edir. Ötənilki çempion L.Hamilton 45 xalla ikinci, onun komanda yoldaşı Valtteri Bottas 40 xalla üçüncüdür. D.Rikkardo isə 37 xalla dördüncü sırada qərarlaşıb.
Formula 1 Azərbaycan Qran-Prisinin qalibi aprelin 29-da keçiriləcək əsas yürüşdən sonra müəyyənləşəcək.
Bölmənin digər xəbərləri
