FÖVQƏLADƏ HALLAR NAZİRİ TÜRKİYƏDƏ İŞGÜZAR SƏFƏRDƏ OLMUŞDUR
Nazirlikdən AZƏRTAC-a bildirmişlər ki, nazir səfərinin ilk günü Türkiyə Cümhuriyyəti Baş Nazirliyinin nəzdində Acil Durum Yönətimi Genel müdiri Həsən İpəklə görüşmüş, iki dost və qardaş ölkə arasında əlaqələrin yüksək səviyyədə olduğunu, bu əlaqələrin təmsil etdikləri qurumlar arasında da genişlənəcəyinə əminliyini ifadə etmişdir.
Həsən İpək rəhbərlik etdiyi təşkilatın fəaliyyəti, kadr potensialı, ölkədə və xaricdə baş verən təbii fəlakətlər, fövqəladə vəziyyətlərdə zərər çəkmiş bölgələrə yardım göstərilməsi ilə bağlı görülən işlərdən danışmış, yeni formalaşan Azərbaycan Fövqəladə Hallar Nazirliyinə hər cür kömək etməyə hazır olduqlarını söyləmişdir.
Kəmaləddin Heydərov həmin gün Türkiyənin Milli Güvənlik Qurumunun Baş Katibliyinə gedərək, qardaş ölkə xilasedicilərinin işləri barəsində məlumat almış, çoxsaylı suallara cavab vermişdir. O, Azərbaycan Fövqəladə Hallar Nazirliyinin təşkilini zəruri edən amillərdən danışmışdır.
Qonaq Mülkü Müdafiə Qərargahında, Türkiyənin Qızıl ay Mərkəzində də olmuşdur.
Martın 8-də Kəmaləddin Heydərov Türkiyə Baş nazirinin müavini, idman və gənclər məsələlərinə rəhbərlik edən dövlət naziri Mehmet Əli Şahinlə görüşmüş, fövqəladə hallar, fəlakətlər zamanı iş birliyinin perspektivlərini müzakirə etmişdir. Əli Şahin bildirmişdir ki, onun bu il aprelin sonu - mayın əvvəlində Azərbaycana nəzərdə tutulan səfəri zamanı imzalanacaq sənəd əməkdaşlığın daha da inkişafı üçün əlverişli zəmin yaradacaqdır.
Kəmaləddin Heydərov demişdir ki, Azərbaycanın hökumət rəsmiləri ulu öndər Heydər Əliyevin “Bir millət - iki dövlət” kəlamını əsas tutaraq, ilk səfərlərini Türkiyəyə edir, bütün məsələlərin həllinə eyni mövqedən yanaşmağı üstün tuturlar. Nazir həmçinin Prezident İlham Əliyevin idmanın inkişafına göstərdiyi qayğıdan, Azərbaycan idmançılarının beynəlxalq yarışlarda qazandığı uğurlardan danışmış, Taekvondo Federasiyasının prezidenti kimi, Türkiyə idmançılarını Bakıda təlim-məşq toplanışına dəvət etmişdir.
Fövqəladə hallar naziri Türkiyə Bayındırlıq Nazirliyi Təbii Fəlakətlər Baş İdarəsində qurumun fəaliyyəti ilə yaxından tanış olmuşdur.
Kəmaləddin Heydərov Ankarada Azərbaycan səfirliyinin əməkdaşları ilə də görüşmüş, iki ölkə arasında əlaqələrin daha da dərinləşməsində onların da üzərinə böyük vəzifələr düşdüyünü vurğulamışdır.
Azərbaycan fövqəladə hallar nazirinin səfəri iki ölkənin uyğun qurumları arasında əlaqələrin yaranması və inkişafında müsbət rol oynayacaqdır.
