FÖVQƏLADƏ HALLAR NAZİRLİYİ TƏHLÜKƏSİZLİK TƏDBİRLƏRİNİ GÜCLƏNDİRMİŞDİR
Nazirliyin ictimaiyyətlə əlaqələr idarəsindən bildirmişlər ki, artıq bir həftə keçməsinə baxmayaraq, sürüşmə davam edir. Komissiya üzvləri kənddə olan 42 evdən 18-nin, bir məktəbin və bir inzibati binanın ciddi zədə aldığını, digərlərinin isə təhlükə altında olduğunu müəyyənləşdirmişlər.
Fövqəladə Hallar Nazirliyinin və yerli orqanların əməkdaşları təhlükə altında olan evlərin boşaldılmasına başlamışlar. Evləri zədələnən və təhlükəli vəziyyətdə olan sakinlərə sürüşmə zonasından kənarda hər birində 8-10 nəfərin yerləşə biləcəyi 16 çadırda müvəqqəti məskunlaşmaq təklif olunsa da, onlar yaxın qohumlarının evlərində yerləşməyi üstün tutmuşlar.
Təhlükəli zonanı Fövqəladə Hallar Nazirliyi mülki müdafə alayının əsgərləri tam nəzarətə götürmüş və burada postlar qurmuşlar. Yarana biləcək təhlükəli hadisələrin qarşısını almaq üçün əraziyə yanğınsöndürmə və təcili yardım maşınları cəlb edilmişdir. Həmçinin sürüşmə nəticəsində daha çox zərər çəkmiş ailələrə ilkin maddi yardım göstərilmişdir.
Fövqəladə Hallar Nazirliyi təhlükəli hadisənin nəticələrini aradan qaldırmaq üçün müvafiq lazımi tədbirləri davam etdirir.
Bölmənin digər xəbərləri
