Fransa bölgəyə sülh gətirmək yox, Cənubi Qafqazda varlığını göstərmək istəyir - Politoloq
Bakı, 19 fevral, AZƏRTAC
Budəfəki Münxen Təhlükəsizlik Konfransında xüsusilə Cənubi Qafqazla bağlı müzakirələrin aparılması ölkəmiz üçün əhəmiyyətlidir. Bununla bərabər, nəzərə almalıyıq ki, Konfransda yeni dünya düzəninin formalaşdırılması, eyni zamanda, Rusiya-Ukrayna müharibəsi ilə bağlı məsələlər də əsas müzakirə mövzusudur. Bu baxımdan hesab edirəm ki, konfransda daha çox diqqətçəkən iki məqam oldu. Bunlardan birincisi yeni dünya düzənində Ukrayna-Rusiya müharibəsi və onun son nəticəsinin necə olacağı, ikincisi isə bizim üçün önəmli olan Cənubi Qafqaz və Azərbaycan ilə bağlı məsələlərdir. Çünki bu gün Azərbaycan Qərb ölkələri üçün əsas enerji təchizatçılarından biri hesab olunur və bu baxımdan Cənubi Qafqazın təhlükəsizliyi ön plandadır.
Bu fikirləri AZƏRTAC-a açıqlamasında Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov söyləyib.
Politoloq bildirib ki, Konfransda Fransa Prezidenti Emmanuel Makronun çıxış etməsi, Birləşmiş Millətlər Təşkilatının (BMT) Təhlükəsizlik Şurasının (TŞ) daimi üzvlük formatından narazılığını ifadə etməsi və digər məsələlər xüsusi önəm daşıyır. Çünki BMT TŞ-nin beş daimi üzvü İkinci Dünya müharibəsindən bəri eyni qalır. Onlardan bəziləri artıq dəyişməlidir. Məsələn, Fransa öz müstəmləkələrini itirib, nüfuzu da getdikcə azalır. Bu səbəbdən də oraya yeni dövlətlərin əlavə olunması zərurətə çevrilir. Məsələn, Türkiyə, Braziliya, Yaponiya kimi ölkələr BMT TŞ-nin daimi üzvlüyünə əlavə oluna bilər. Yaxud da Azərbaycan Prezidentinin dediyi kimi, yeni qurumlar, yəni, Qoşulmama Hərəkatının rəhbəri kimi olacaqsa, yaxud İslam ölkələrindən olan nümayəndə BMT Təhlükəsizlik Şurasında təmsil oluna bilər.
“Fransa Prezidentinin Cənubi Qafqazla bağlı söylədiyi məsələyə gəldikdə, qeyd edə bilərik ki, Rusiyasız dünyanı təsəvvür etmək çətin məsələdir. Makronun regionla bağlı dediklərinə cavab olaraq xatırlatmaq istəyirik ki, Azərbaycan müstəqil xarici siyasət yürüdən dövlət kimi Ermənistanla münaqişəni başa çatdırıb, Qarabağ məsələsini həll edib. Növbəti proses Ermənistanla sülh müqaviləsini yekunlaşdırmaqdır. Bu baxımdan E.Makronun söylədikləri Fransanın 2020-ci ildə Qafqazdan çəkilməsindən sonra yenidən bölgəyə qayıtmaq cəhdlərindən başqa bir şey deyil. Azərbaycan isə bütün prosesləri nəzərə alaraq təhlükəsizliyinin təmin olunması üçün maksimum addımlar atmalıdır”, - deyə S.Hümbətov vurğulayıb.
Politoloq əlavə edib ki, Fransa Prezidentinin Cənubi Qafqazda “müharibə var” deməsi, həmçinin Nikol Paşinyanın yanında olmasını vurğulaması onun, sadəcə, bölgəyə gəlmək niyyətini göstərir. Aydın olur ki, Fransanın məqsədi bölgəyə sülh gətirmək deyil, əksinə, Cənubi Qafqazda özünün varlığını göstərməkdir. Amma Fransa anlamalıdır ki, Cənubi Qafqazda söz sahibi region dövlətləri və Azərbaycandır. Ona görə də Fransa boş xəyallara qapılmamalıdır.
Bölmənin digər xəbərləri
