Fransa hökuməti günahkarların məsuliyyətə cəlb olunması vəzifəsini daşıyır – Bəyanat
Bakı, 30 iyun, AZƏRTAC
Azərbaycan Açıq Hökumət Platforması azərbaycanlı jurnalistlərin Fransada təzyiqə məruz qalması ilə əlaqədar bəyanat verib.
AZƏRTAC bəyanatı təqdim edir: "İyunun 28-də Azərbaycan Televiziya və Radio Verilişləri QSC-nin (AzTV) əməkdaşları Fransada çəkiliş apararkən təzyiqə məruz qalıb. Təqiblərə şifahi təhqir, zorakılıqla hədələmə və fiziki hədə-qorxu daxildir. Bu hadisə söz və mətbuat azadlığının açıq şəkildə pozulmasıdır. Ümumdünya İnsan Hüquqları Bəyannaməsinin 19-cu maddəsində deyilir ki, “hər kəsin fikir və ifadə azadlığı hüququ var; bu hüquqa heç bir müdaxilə olmadan öz fikirlərinə sahib olmaq, dövlət sərhədindən asılı olmayaraq istənilən KİV vasitəsilə məlumat və ideyaları axtarmaq, almaq və yaymaq azadlığı daxildir". Söz və mətbuat azadlığı Avropa İnsan Hüquqları Konvensiyası ilə qorunur və Konvensiya ifadə azadlığı hüququnu təmin edir. Fransa hökuməti bu hadisəni obyektiv şəkildə araşdırmaq və günahkarların məsuliyyətə cəlb olunmasını təmin etmək vəzifəsini daşıyır.
Söz və mətbuat azadlığı sağlam demokratiya üçün vacibdir. Biz Fransa hökumətini bu hüququ qorumaq üçün bütün lazımi addımları atmağa və jurnalistlərin təqib və hədə qorxusu olmadan öz işlərini görmələrini təmin etməyə çağırırıq”.
Bölmənin digər xəbərləri
