Fransa Prezidentinin Münxendəki çıxışı dünyanı daha da təhlükəli etməyə çağırış kimi qiymətləndirilməlidir
Bakı, 20 fevral, AZƏRTAC
Fransa Prezidenti Makronun Avropa siyasətinə gətirmək istədiyi aqressiv və illüzionist ritorika hər cəhdində iflasa uğrasa da, o bu ənənəsindən əl çəkmək istəmir. Bu gün Makronun iddialı xarici siyasətinin heç bir geosiyasi məkanda uğur qazanmaması acı bir gerçəklikdir. Əlcəzairdə, Liviyada, Şimali Afrikada və Aralıq dənizi hövzəsində və hətta ən son Burkino-Fasoda iflas edən bu siyasət nədənsə Makron üçün obyektiv nəticə çıxarmaq üçün dərsə çevrilmir. Makronun növbəti xarici siyasət iddialarının ünvanı isə Cənubi Qafqazadır. Görünür “bacısı” Ermənistanın imkanlarını xəyalpərəstliklə qiymətləndirən Makron onu öz neokolonist məqsədlərinin yeni aləti kimi görür. Elə bu səbəblərdəndir ki, Fransa Prezidentinin 59-cu Münxen Təhlükəsizlik Konfransında etdiyi çıxışı təhlükəsizlikdən daha çox dünyanı daha da təhlükəli etməyə bir çağırış kimi qiymətləndirilməlidir. Çünki Makron çıxışında Rusiyadan başlamış Qafqaza qədər, Yaxın Şərqdən başlamış Afrikaya qədər böyük bir coğrafiyada hamıya müharibə elan edir. Hələ bu azmış kimi BMT-nin də fəaliyyətindən narazılıq edir. Ancaq məsələ ondadır ki, belə aqressiv və təhdid dolu fikirlərin müəllifi olan Prezidentin rəhbərlik etdiyi Fransa hazırda ABŞ-nin dünya hegemoniyası uğrunda apardığı müharibədə, sadəcə, bir vassaldır. ABŞ-nin hibrid müharibəsində bir alətdir. Onun adından Rusiyaya qarşı vəkalət müharibəsində iştirak edən silahtutandır.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu bildirib.
“Makronun fikirləri isə ona görə cəsarətli görünür ki, bu çıxış Makronun siyasi monoloqudur, vəssalam. Real geostrateji proseslərdə isə onun səsləndirdiyi iddiaları həyata keçirmək üçün Makronun nə hərbi-siyasi gücü, nə də real iqtisadi potensialı var. Ancaq bu da məsələnin yalnız bir tərəfidir. Görünür Makron BMT-nin əlçatanlıq məsələsini tamamilə başqa prizmadan görür. Hazırda aktual olan məsələ BMT TŞ-də qərarların qəbulu zamanı konsensus və obyektivlik üçün üzvlərin sivilizasiyalar üzrə proporsionallığı məsələsidir. Makron isə bunu veto hüququnun ümumi konsensusla əvəzlənməsi kimi görür ki, bu da tamamilə yanlışdır. Ən ziddiyyətli fikirlərdən, məsələlərdən biri isə Fransa Prezidentinin Rusiyanı neokolonist adlandırmasıdır. Ancaq məsələ ondadır ki, Rusiyanı neokolonizmdə ittiham edən Makron elə həmin çıxışındaca başdan-başa Fransa neokolonizmini irəli sürür. Rusiyanın Ukraynaya hücumunu pisləyir, ancaq özünün Ağ dənizdə hərbi eskalasiyasından danışmır”, - deyə Hikmət Babaoğlu bildirib.
Deputat qeyd edib ki, Makron neokolonist Rusiyanın Qafqazda problemləri həll edə bilməyəcəyini irəli sürür, özünün Ermənistana yeni neokolonizm üçün Fransa jandarmeriyasını göndərməyindən danışmır. Bu siyasi istehzadır. Belə çıxır ki, Rusiya neokolonist olanda bu pisdir, ancaq Fransa neokolonist olanda bu yaxşıdır? Fransa Prezidentinin ziddiyyətli və ambisiyalı monoloqu bununla da bitmir. Dostu Paşinyana söz verir ki, onun yanında dayanmaqda davam edəcək. Bu fikir Makronun Fransanı da öz siyasi çəkisinə endirməsidir. Şarl de Qoll, yaxud Jak Şirak Fransası ilə müqayisədə Makron Fransası o qədər kiçilib ki, Rusiyanın forpostu Ermənistan qarşısında öhdəçilik götürür. Nəhayət Makron deyir ki, biz gərək bizim dəyərləri bölüşməyən avtokrat rejimlərlə işləyək, ancaq o gərək sonra Rusiya kimi etməsin. Cənab Makron Sizin dəyərlər 3 milyon əlcəzairlini, yüz minlərlə yəmənlini, milyonlarla Şimali Afrika xalqlarını, korsikalıları öldürmək və soyqırımı törətməkdirsə, sizin dəyərlər soyqırımı törətmiş bacınız Ermənistanın işğalçılıq siyasətindən əl çəkməməsini dəstəkləməkdirsə, o dəyərləri nə Qafqazda, nə də dünyanın heç bir yerində heç kimlə bölüşə bilməyəcəksiniz. Ona görə də bəri başdan Fransa neokolonizmi iddialarınızdan əl çəkin.
Bölmənin digər xəbərləri
