Fransada irqçi ifadələrin, hüquq pozuntularının və cinayətlərin artması narahatlıq doğurur
Paris, 5 iyun, AZƏRTAC
İnsan Hüquqları üzrə Milli Məşvərət Komissiyasına (CNCDH) görə, Fransada irqçi ifadələrin, hüquq pozuntularının və cinayətlərin artması narahatlıq doğurur.
AZƏRTAC xəbər verir ki, CNCDH-nin irqçiliklə bağlı illik hesabatında bu narahatlıqdan yazılıb.
“Franceinfo” televiziya kanalında CNCDH-nin prezidenti Jan-Mari Burguburu irqçi ifadələrin yayılmasında internetin rolunu və qanuni tədbirlərin görülməsinin vacibliyini vurğulayıb. “İnternetdə irqçi ifadələr söyləyənlərlə bağlı məhkəmə prosesi başlayacaq. Əgər bu proseslər daha əvvəl başlansaydı, bəlkə də faciənin qarşısını ala bilərdilər”, - deyə o, tunisli bərbər İşem Mirauini öldürməzdən əvvəl şübhəli şəxsin “Facebook” səhifəsində təhdid və irqçi videolar yayımladığını diqqətə çatdırıb.
CNCDH-nin irqçiliklə bağlı illik hesabatının yaxın günlərdə rəsmi olaraq Baş nazirə təqdim ediləcəyini bildirən Jan-Mari Burguburu hesab edir ki, irqçi ifadələrin, təhqirlərin və cinayətlərin artması narahatlıq doğurur. Göstərilən rəqəmlər həyəcanvericidir. Antisemitizm aktlarında 284 faiz artım var.
“İrqçi cinayətlər mahiyyətinə görə fərqlənməməlidir. Bütün belə xarakterli cinayətlər qadağan edilməlidir və hökuməti daha güclü tədbirlər görməyə çağırmalıyıq”, - deyən Burguburu qeyd edib ki, irqçi hərəkətlərin 97 faizi bildirilmir. Əslində, irqçi cinayətlər danışılandan daha çoxdur. İrqçiliyin qurbanları şikayət etməyə təşviq edilməlidirlər. İrqçi davranışlara alışmamalıyıq.
Bölmənin digər xəbərləri
