Fransanın humanitar oyunları və əsl səbəbləri - ŞƏRH
Bakı, 1 sentyabr, AZƏRTAC
Bəzi dövlətlər var ki, nə qədər maskalansa da özünü demokrat, insan haqlarının daşıyıcısı və müdafiəçisi kimi göstərməyə çalışsa da gec-tez maskaları düşür, əsl simaları üzə çıxır. Sülhpərvər, demokrat deyil, xəbis, məkrli, imperialist və irqçi niyyətləri aydın olur. Son illər xarici və daxili siyasətdə uğursuzluğa düçar olan, həm beynəlxalq müstəvidə, həm də ölkə daxilində kifayət qədər problemlərlə üzləşən Fransa rəhbərliyinin Ermənistan-Azərbaycan münaqişəsində gərginliyi artırmaq, süni ajiotaj yaratmaq cəhdləri ilə Cənubi Qafqaza müdaxiləsi, siyasi oyunları, BMT-dəki təşkil etməyə çalışdığı tamaşalar - şoular ilə məqsədləri nədir? Otuz il ərzində Azərbaycanın torpaqları işğal altında qalanda, kənd və şəhərləri viran olunanda, tarixi və mədəniyyət abidələri dağıdılanda, minlərlə insan, o cümlədən uşaqlar, qadınlar, qocalar qətlə yetiriləndə, yüz minlərlə vətəndaşı ata-baba yurdlarından didərgin salınanda Fransa bu vəhşiliyi, faşizmi, bu qeyri-insani davranışı görmürdü? Bəs, onlarda mürgüləyən humanizm, insanpərvərlik hissləri oyanmırdı? Necə oldu ki, Fransanın bu “insanpərvər hissləri” nəhayət 44 günlük Vətən müharibəsindən, Azərbaycanın Zəfərindən sonra qəflət yuxusundan oyandı? Bəlkə də uğursuzluq bataqlığında boğulan Fransanın bu çabaları diqqəti öz problemlərindən yayındırmaq məqsədi daşıyır. Əlbəttə, səbəblər çoxdur. Amma bütün təhlillər bir həqiqəti ortaya qoyur ki, Fransa hakimiyyəti həmişə olduğu kimi heç Ermənistana da səmimi deyil.
Bu sözləri AZƏRTAC-a açıqlamasında siyasi ekspert Əhməd Abbasbəyli deyib.
Siyasi ekspert bildirib ki, Fransanın bu impulsiv və bəzən xaotik hərəkətlərinin səbəblərindən biri onun son illər həyata keçirdiyi uğursuz xarici siyasəti nəticəsində Avropa İttifaqı və NATO daxilində nüfuzunun tədricən itməsi və hələ ki, təsir dairəsində olan keçmiş müstəmləkələrdə - Afrika dövlətlərində baş verənlərdir. Digər səbəb isə ölkə daxilində problemlərin həddən artıq çoxluğudur ki, bunlardan ən diqqəti cəlb edəni miqrantlarla bağlıdır. Reallığı düzgün qiymətləndirməyi bacarmayan Fransa son illər mütəmadi olaraq müxtəlif iğtişaşların qarşısını ala bilmir. Afrikada, o cümlədən Əlcəzairdə müstəmləkəçi, irqçi siyasətini həyata keçirən, milyonlarla afrikalıların qətlinə səbəb olan Fransa həmin fəaliyyətini yeni formada, sivil (humanitar) don geyindirərək yeni ərazilərdə tətbiq etməyə fürsət axtarır. Digər mənada özünün də yaratmaq istədiyi süni gərginliklər fonunda Cənubi Qafqaza pərçimlənmək, bu ərazini təsir dairəsinə salmaq istəyi Fransanın qaranlıq keçmişinin əks-sədasıdır. Üzdə özünü erməni maraqlarının müdafiəçisi, humanizmin daşıyıcısı kimi göstərməyə çalışan Parisin əvvəllər olduğu kimi bu təxribatçı planları da uğursuzluqla nəticələnəcək. Fransa prezidenti Emmanuel Makron başda olmaqla, Fransa hökuməti istədiyi qədər humanitar yardım da göndərə bilər, istədiyi kimi hay-həşir də sala bilər, müxtəlif təşkilatlara müraciətlər, şikayətlər də edə bilər, amma heç nəyə nail ola bilməyəcək, bütün cəhdləri uğursuzluğa düçar olacaq.
“Separatizmi dəstəkləyən digər ölkələr kimi, bu bəla Fransadan da yan keçməyəcək və ona da təsir edəcək. Həmçinin Fransa və fransızlar separatizmi, xəyanəti, erməni həyasızlığını kənardan dəstəkləməyin necə neqativ, ləyaqətsiz bir davranış olduğunu dərk edəcəklər”, - deyə ekspert əlavə edib.
Bölmənin digər xəbərləri
