Fransanın regional məsələlərə yanaşması yalnız ermənipərəst xarakter daşıyır - AÇIQLAMA
Bakı, 19 yanvar, AZƏRTAC
Fransanın regional məsələlərə yanaşması yalnız ermənipərəst xarakter daşıyır, beynəlxalq hüquq, Azərbaycanın ərazi bütövlüyünün tanınması və digər amillərlə heç bir əlaqəsi yoxdur. Buna görə də Fransa Senatının Azərbaycan əleyhinə qətnaməsi gözlənilən idi.
AZƏRTAC xəbər verir ki, bu fikirlər türkiyəli politoloq, Ankara Universitetinin professoru Toğrul İsmayılın bu günlərdə Fransa Senatının (Parlamentin yuxarı palatası) Avropa İttifaqına (Aİ) Azərbaycana qarşı sanksiyaların tətbiqi barədə çağırışları ilə bağlı qəbul etdiyi qətnaməyə dair şərhində yer alıb.
“Rəsmi Paris Cənubi Qafqazda öz nüfuzunu bərpa etməyə çalışır. Xatırlatmaq istəyirəm ki, Fransa ATƏT-in Minsk qrupunun həmsədri olub və buna görə də, regionda fəaliyyət göstərib. O, indi də bununla bağlı böyük ambisiyalarını davam etdirir. Təəssüf ki, o vaxt da, indi də Fransanın siyasəti beynəlxalq hüquqa adekvatlığı və uyğunluğu ilə fərqlənməyib”, - deyə o bildirib.
Ekspert xatırladıb ki, Fransa tərəfi uzun müddətdir Azərbaycana təsir göstərməyə çalışır, lakin hər şey əbəsdir: “Ona görə də yeni metodlar işə düşür: biz Fransa Parlamentinin (Fransa Senatının) anti-Azərbaycan hücumlarının, ayrı-ayrı bələdiyyələrin (şairə Natəvanın abidəsi ilə bağlı problem - red.), müxtəlif siyasi liderlərin və ya dairələrin bəyanatlarının şahidi oluruq. Lakin bir daha deyirəm, Fransanın hərəkətləri beynəlxalq hüquqa uyğun olmadığı üçün bu ölkənin qarşıya qoyulan məqsədlərə nail olması ehtimalı azdır”.
Türkiyəli politoloqun fikrincə, Fransa ilə Azərbaycan arasında gərgin münasibətlər ölkəmizin Avropa İttifaqı ilə münasibətlərinə yalnız dolayı yolla təsir edə bilər. Ümumiyyətlə, hadisələrin bu cür inkişafı mümkün deyil.
“Avropa İttifaqının ölkəmizlə enerji müttəfiqi və Cənubi Qafqazda çox ciddi oyunçu kimi öz münasibətləri mövcuddur. Bütün kommunikasiya yolları Azərbaycandan keçir. Məncə, Brüsseldə başa düşürlər ki, Azərbaycanla neqativ münasibətlər Cənub Qaz Dəhlizinin və yeni nəqliyyat-kommunikasiya layihələrinin əhəmiyyətini dərk edən Avropa İttifaqının xeyrinə deyil. Əlbəttə, bəzi Aİ ölkələri bu məsələdə tam obyektiv deyillər və açıq şəkildə ermənipərəst mövqe tuturlar. Lakin bu, əslində ciddi məsələ deyil, çünki Azərbaycan haqlıdır və beynəlxalq hüquq Azərbaycanın tərəfindədir”, - deyə T.İsmayıl qeyd edib.
Rəsmi Bakının reaksiyasından danışan professor bildirib ki, Azərbaycan bir sıra adekvat qərarlar qəbul etməlidir, o cümlədən Parisə rəsmi nota təqdim olunmalıdır. O, eyni zamanda, Milli Məclisdə bu barədə kifayət qədər fikrin bildirildiyini, onların arasında yetərincə məqbul fikirlərin olduğunu xatırladıb: “Qəbul ediləcək qərarların qəti şəkildə Fransa əleyhinə olmalı olduğunu və ya sadə Fransa vətəndaşlarına təsir göstərməli olduğunu düşünmürəm. Onlar yalnız yuxarıda qeyd olunan anti-Azərbaycan proseslərində fəal iştirak etmiş fransız idarəçilərinə və ya siyasi şəxslərinə, bu ölkənin bölgəmizdəki iqtisadi və siyasi maraqlarına qarşı yönəlməlidir. Ümumiyyətlə, Fransa Senatının qətnaməsini ciddi qəbul etməyə dəyməz, çünki o, sırf siyasi xarakter daşıyır... Fikrimcə, yaxın vaxtlarda Fransa rəhbərliyi dəyişəcək və o zaman Azərbaycan-Fransa münasibətləri normal məcrasına düşəcək”.
Politoloqun fikrincə, bununla bağlı müəyyən qərarın qəbul edilməsi Fransa tərəfinə anormal qətnamələr qəbul etməzdən əvvəl, əlbəttə ki, bunun müvafiq nəticələrinin olacağını başa düşməyə imkan yaradar.
“Ümumiyyətlə, “İt hürər, karvan keçər” prinsipini rəhbər tutmaq lazımdır. Bir daha deyirəm, Azərbaycan həm obyektiv baxımdan, həm də beynəlxalq hüquq nöqteyi-nəzərindən haqlıdır. Azərbaycan öz ərazi bütövlüyünü bərpa edib, Azərbaycan ərazisində yaşayan etnik ermənilərə qarşı heç bir təzyiq olmayıb və yoxdur. Bakıda və digər şəhərlərdə kifayət qədər erməni yaşayır. Onu da xatırlatmaq lazımdır ki, başqa dövlətlərin bu cür davranışları ölkəmizdə müəyyən gərginlik, əhali arasında əlavə ksenofob əhval-ruhiyyə yaradır, bu isə yolverilməzdir”, - deyə T.İsmayıl fikrini tamamlayıb.
Bölmənin digər xəbərləri
