FRANSIZ QIZI SLAVYAN UNİVERSİTETİNDƏ AZƏRBAYCAN DİLİNİ ÖYRƏNİR
İzabel Rişar Şərq dillərindən əvvəlcə ərəb dilini öyrəndiyini, sonra türk dilinə yiyələnməyə başladığını söylədi. Üçüncü kursda oxuyarkən Azərbaycan dilinə üstünlük verdiyini deyən İ.Rişar belə melodik dili olan xalqın tarixi, mədəniyyəti, ədəbiyyatının onun üçün çox maraqlı olduğunu vurğuladı. Fransalı magistrant ədəbiyyatımızın görkəmli nümayəndələri haqqında məlumatı olduğunu, bu yaxınlarda universitetdə “Azərbaycan: dil, ədəbiyyat və cəmiyyət” mövzusunda keçirilən beynəlxalq konfransda yazıçı Anarla söhbət etdiyini dedi. Bakı Slavyan Universitetində dil öyrənmək üçün hər cür metodiki və texniki imkanların olduğunu söyləyən İzabel Rişar qayğıkeş və tələbkar müəllimlərin köməyi ilə üç ay müddətində Azərbaycan dilinə mükəmməl yiyələnəcəyinə əminliyini bildirdi.
Bölmənin digər xəbərləri
