Gəmiçilikdə 20 Yanvar faciəsinin ildönümünə həsr olunan anım mərasimi keçirilib
Bakı, 18 yanvar, AZƏRTAC
“Azərbaycan Xəzər Dəniz Gəmiçiliyi” QSC-də 20 Yanvar faciəsinin 26-cı ildönümünə həsr olunan anım mərasimi keçirilib.
AZƏRTAC xəbər verir ki, mərasimə xalqımızın azadlığı uğrunda canlarından keçmiş şəhidlərimizin xatirəsini bir dəqiqəlik sükutla yad edərək başlanılıb.
“Azərbaycan Xəzər Dəniz Gəmiçiliyi” QSC-nin sədri Rauf Vəliyev 1990-cı il yanvarın 20-sinin Azərbaycanın müasir tarixinə ən faciəli günlərdən biri, eyni zamanda, qəhrəmanlıq səhifəsi kimi daxil olduğunu, xalqımızın milli müstəqillik, azadlıq uğrunda mübarizəsinin və yenilməz iradəsinin rəmzinə çevrildiyini deyib. Bildirib ki, həmin vaxt Moskvada yaşayan, ümummilli lider Heydər Əliyev həyatını təhlükəyə ataraq, faciənin ertəsi günü Azərbaycanın daimi nümayəndəliyinə gəlib, qanlı Yanvar qırğınını törədənləri pisləyən kəskin bəyanatla çıxış edib, xalqımızın başına gətirilən müsibəti dünyaya çatdırıb. Bununla da Ulu Öndər cəsarətini, mərdliyini, xalqının sədaqətli oğlu olduğunu bir daha nümayiş etdirib.
R.Vəliyev qeyd edib ki, 20 Yanvar faciəsi zamanı dənizçilər əsl fədakarlıq və qəhrəmanlıq nümunəsi göstərib. “Sabit Orucov”, “Neftqaz-64”, sonradan şəhid Atamoğlan Kərimovun adı verilmiş “Atlet-21”, “Samir Quliyev”, “Oqtay Vəliyev”, İlqar Quliyev”, “Vodoley-4”, “Hövsan-2”, “Salyut” və neçə-neçə digər gəmilərimizin Bakı buxtasında həmrəylik nümayiş etdirməsi təcavüzkarlara layiqli cavab olub, dənizçilərimizin bütün xalqımızla birliyini göstərib.
“Yanvar faciəsinə əsl hüquqi, siyasi qiymət ulu öndər Heydər Əliyevin hakimiyyətə qayıdışından sonra verilib. Dahi şəxsiyyət Heydər Əliyev 20 Yanvar faciəsinin səbəblərinin və günahkarlarının aşkarlanması üçün yaradılan komissiyanın işini bərpa etməklə əsl həqiqəti üzə çıxardı, xalqla birliyini bir daha təsdiqlədi. Xalqımız Azərbaycanın müstəqilliyinin əbədiliyi uğrunda xilaskarlıq missiyasını yerinə yetirən ümummilli lider Heydər Əliyevin ətrafında birləşdi”, - deyə QSC sədri vurğulayıb.
Rauf Vəliyev bildirib ki, 2003-cü ildən bu günə qədər olan dövrü böyük yolun davamı kimi dəyərləndirən xalqımız Azərbaycan Respublikasının Prezidenti İlham Əliyevin həyata keçirdiyi siyasətə dəstək olduğunu onun ətrafında daha sıx birləşməklə nümayiş etdirir. Bu birliyin sayəsində Azərbaycanın uğurları bir-birini əvəzləməklə, səsi dünyanın ən nüfuzlu təşkilatlarının tribunalarından eşidilir.
Daha sonra Dəniz Nəqliyyatı İşçiləri Həmkarlar İttifaqı Respublika Komitəsinin sədri Səməd Allahverdiyev 26 il əvvəl baş verən faciə haqda fikirlərini bölüşüb.
Onun sözlərinə görə 20 Yanvar hadisələrində xalqımızın haqq səsinə dəstək olan dənizçilər 120-dək gəmi ilə Bakı buxtasında lövbərə dayanaraq həyəcan siqnalı verməklə, qırğına etirazlarını bildirdilər. Buxtanı mühasirəyə alan dənizçilər bununla hərbi gəmilərin sahildən uzaqlaşmasına icazə vermədilər. Sovet ordusunun hərbçilərinin gəmiləri gülləbarana tutmaları nəticəsində, dənizçilər də şəhidlər verdi, 52 nəfər həbs olundu. Həmin vaxt Bakıda törədilən qırğın barədə xəbəri xaricə də məhz gəmilərin həyəcan siqnalı vasitəsilə dənizçilər çatdırdılar.
Sonra 20 Yanvar faciəsinin canlı şahidi olan dənizçilər 1990-cı il yanvarın 19-dan 20-nə keçən gecə sovet ordusunun Azərbaycan xalqına qarşı törətdiyi qanlı faciənin mahiyyətindən danışıb.
Sonda tədbir iştirakçıları 20 Yanvar faciəsindən bəhs edən sənədli filmə baxdılar.
Bölmənin digər xəbərləri
