“GORANBOY ABİDƏLƏRİ” KİTABI ÇAPDAN ÇIXMIŞDIR
Son tunc və ilk dəmir dövrünə aid edilən Borsunlu, Qaşaltı, Qaraqoyunlu, Səfikürd, Qarqucaq və Qasımbəyli kurqanlarından arxeoloji tədqiqatlar nəticəsində tapılmış zəngin maddi-mədəniyyət nümənələri onu deməyə əsas verir ki, Goranboy rayonunun ərazisi ən qədim insanların ilkin yaşayış məskəni olmuşdur. Bu baxımdan gənc tədqiqatçılar Elmar Əliyev və Gündüz Hacıyevin tariximizin keçmişi, bu günü və sabahı arasında körpü salan, mənəvi irsimizin qoruyucuları və saxlanc yadigarları olan abidələrimizin geniş oxucu kütləsinə çatdırmaq məqsədi ilə çap etdikləri “Goranboy abidələri” kitabı çox əhəmiyyətlidir. Nəfis şəkildə nəşr olunmuş kitabda bölgənin tarixi, etnoqrafiyası, baş vermiş mühüm tarixi hadisələr, qəbirüstü daş heykəllər, türbələr, məscidlər və sair abidələr, habelə 1805-ci il mayın 14-də Rusiya ilə Qarabağ xanlığı arasında bağlanmış Kürəkçay və 1813-cü il oktyabrın 12-də Qarabağda Rusiya ilə İran dövlətləri arasında bağlanmış “Gülüstan müqaviləsi”nin mətnləri geniş oxucu kütləsi tərəfindən maraqla qarşılanmışdır. Kitabın elmi redaktoru tarix elmləri doktoru Arif Məmmədov Azərbaycan abidələri ilə bağlı çap olunmuş bu yeni nəşrə yazdığı ön söz də yüksək qiymətləndirmişdir.
Bölmənin digər xəbərləri
