Bakı, 2 sentyabr, AZƏRTAC

İnsan da təbiət kimidir. Təbiət yazda çiçək açır, yaya doğru yaşıllaşır, payızda bəhrə verir, qışda ağ yorğanına bürünüb dincəlir və hər il yazda bu ənənə təzədən təkrar olunur. Təəssüf ki, təbiətlə insan arasındakı bənzəyişlə yanaşı, bir fərqlilik də var: insan təbiət kimi təzədən doğula bilmir. O, bir dəfə yaşayır, bir dəfə çiçək açıb bar verir və vaxtı çatanda dünyaya “əlvida” deyib gedir. Lakin elə xoşbəxt insanlar var ki, onlar bu dünyaya “əlvida” deyəndən sonra ad unudulmur, dostları, həmkarları, onu tanıyanlar, doğmaları, ailə üzvlərinin ürəyində özünə əbədiyyət heykəli qoyur və hər dəfə xatirələri, söz-söhbətləri yada düşdükcə nurlu siması illərin arxasından boy göstərir, sanki bu xatirələr, yadasalmalarla yenidən sıralarımıza qayıdırlar. Uzun illər müxtəlif rəhbər vəzifələrdə işləmiş Musa Məmmədov məhz belə unudulmaz və hər zaman xatırlanan şəxsiyyətlərdəndir.

AZƏRTAC xəbər verir ki, bu barədə görkəmli ictimai və dövlət xadimi Musa Məmmədovun xatirəsinə həsr olunmuş “Sədaqət və saflıq simvolu” kitabının təqdimatında danışılıb.

Kitabın redaktoru, filologiya elmləri doktoru Abid Tahirli, əvvəlcə “Sədaqət və saflıq simvolu”nun yaranması ideyası, onun üzərində apardığı yaradıcılıq işi barədə məlumat verib, sağlığında böyük rəğbət və ehtiram qazanmış ictimai xadimin aqronom, alim, ziyalı və rəhbər kimi müstəsna keyfiyyətləri barədə danışıb.

Çıxış edən iqtisad elmləri namizədi Namiq Murad, Əməkdar kənd təsərrüfatı işçisi İmran Əbilov, ictimai-siyasi xadim, Yeni Azərbaycan Partiyası Veteranlar Şurasının sədri Arif Rəhimzadə və başqaları Əməkdar aqronom, iqtisad elmləri doktoru, kənd təsərrüfatı elmləri namizədi, Dövlət mükafatı laureatı Musa Məmmədovun vətəndaş yanğısı, torpağa olan məhəbbətindən çoxlu misallar çəkib və kitabda onun xarakterinin bu keyfiyyətlərinin hərtərəfli əks olunduğunu qeyd ediblər. Onlar torpaq sevgisi ilə yaşayan Musa müəllimin bu fikirlərini dönə-dönə qeyd ediblər: “Təbiətin bizə bəxş etdiyi ən qiymətli sərvət torpaqdır. Torpaq bizim “çörək ağacımız”dır, həm də yaşayışımızın əsasını təşkil edir. Torpaq bizim üçün əzizdir, doğma və müqəddəsdir, torpaq Vətən deməkdir”. Bu sözlər kənd təsərrüfatı və meşə təsərrüfatının müxtəlif sahələrinin inkişafı ilə əlaqədar 40 elmi əsərin, monoqrafiya, kitab və 5 ixtiranın müəllifi Musa Məmmədovun həyatından qırmızı xətlə keçir və həqiqətən torpaq onun ən böyük sevgisi idi.

Müxtəlif vaxtlarda onunla bir yerdə işləmiş Həmzə Məlikov, Zahid Abbasov, Xəndan Rəcəbli, Alimşah Mirzəyev və başqaları xatirələrini söyləmiş, öz ürək sözlərini ifa ediblər.

Gənc şairə Fatimə Vəfa mərhumun xatirəsinə həsr etdiyi şeirini oxuyub.

Təqdimat mərasimində tibb üzrə fəlsəfə doktoru Günel Məmmədova atasının xatirəsini əziz tutduqları üçün toplaşanlara təşəkkür edib.

Sonda “Sədaqət və saflıq simvolu” kitabı iştirakçılara paylanılıb.