Görkəmli memar Tofiq Abdullayevin xatirəsi anılıb
Bakı, 25 dekabr, AZƏRTAC
Azərbaycan Memarlıq və İnşaat Universitetində (AzMİU) Əməkdar memar Tofiq Abdullayevin xatirəsi anılıb.
Bu barədə AZƏRTAC-a universitetdən bildirilib. Tədbiri giriş sözü ilə açan AzMİU-nun rektoru professor Gülçöhrə Məmmədova görkəmli memarın zəngin fəaliyyətindən, Azərbaycanın milli memarlıq sənətinə verdiyi töhfələrdən danışıb. Rektor bildirib ki, uzun müddət Memarlıq konstruksiyaları və abidələrin bərpası kafedrasının professoru olmuş Tofiq Abdullayev Azərbaycanın milli memarlıq ənənələrini öz yeni axtarışları ilə daim zənginləşdirib, memarlığın elm kimi təşəkkülündə, ölkə üçün yüksəkixtisaslı kadrların hazırlanmasında müstəsna xidmətlər göstərib.
Professor Gülçöhrə Məmmədova görkəmli memarın layihəsi əsasında AzMİU-da tədris-laboratoriyası, idman kompleksinin tikilməsi, eləcə də çalışdığı kafedranın memar alimləri ilə birgə Şəkinin Kiş, Qəbələnin Nic kəndində məbədlərin bərpası, Qaxda Qum məbədinin konservasiya işlərini xatırladıb.
Alimin 40-dan çox elmi əsərin müəllifi, 3 kitabın həmmüəllifi olduğunu deyən rektor qeyd edib ki, Tofiq Abdullayev ömrünü sevdiyi sənətə həsr edən görkəmli memar, pedaqoq, vətənini, millətini böyük məhəbbətlə sevən ziyalı olub.
Azərbaycan Memarlar İttifaqı İdarə Heyətinin sədri professor Elbay Qasımzadə görkəmli memar haqqında fikirlərini bölüşüb. O, professor Tofiq Abdullayevin layihəsi ilə inşa edilən tikililərdə klassik memarlığın ənənəvi üsullarından və Azərbaycan milli memarlığının səciyyəvi elementlərindən bacarıqla istifadə edildiyini bildirib. Elbay Qasımzadə qeyd edib ki, Bakı şəhərinin hazırkı memarlıq simasında Tofiq Abdullayevin layihəsi əsasında inşa edilən tikililər xüsusi əhəmiyyətə malikdir.
Tofiq Abdullayevlə birgə çalışan AzMİU-nun müəllimləri, yaxınları onu cəfakeş müəllim, ləyaqətli ziyalı kimi xarakterizə ediblər. Görkəmli memarın elmini və zəngin təcrübəsini ali məktəb auditoriyalarında gənclərlə səxavətlə bölüşdüyünü diqqətə çatdırıb, elmi tədqiqatlarının gənc nəslə dəyərli miras kimi qoyub getdiyini deyiblər.
Bölmənin digər xəbərləri
